Монгол Улсаас Бүгд Найрамдах Куба Улсад суугаа Онц бөгөөд Бүрэн эрхт Элчин сайд С.Золжаргал тус улсын алдарт балетчин Алисиа Алонзогийн нэрэмжит Хаванагийн их театрын Ерөнхий захирал Леонардо Тур Брочетэй уулзаж, хамтын ажиллагааны асуудлаар энэ сарын 14-нд санал солилцлоо.
Элчин сайд С.Золжаргал хоёр улсын соёл урлагийн салбарын хамтын ажиллагааны хүрээнд дэлхийд алдартай уг театрт Монголын уран бүтээлчдийн тоглолтыг толилуулах, энэ онд тохиож буй хоёр орны хооронд дипломат харилцаа тогтоосны 65 жилийн ойг тохиолдуулан хамтарсан ажлууд зохион байгуулах боломжуудын талаар ярилцлаа.
Ерөнхий захирал Леонардо Элчин сайдын саналыг талархан хүлээн авч байгаагаа илэрхийлээд Монгол Улсын Гавьяат жүжигчин, алдарт балетчин Д.Алтанхуяг 2018 онд тус театрын тайзнаа уран бүтээлээ толилуулж байсныг дурдаад, цаашид хамтарсан уран бүтээл хийх, харилцан туршлага судлах зэргээр хамтран ажиллах сонирхолтой байгаагаа илэрхийлэв.
Хаванагийн их театрыг 2015 онд Кубын алдарт балетчин Алисиа Алонзогийн нэрэмжит болгосон бөгөөд театрын барилгын загварыг Белгийн архитектор гаргаж, Нью-Йоркийн инженерийн компани 1914 онд барьж байв гэж Монгол Улсаас Куба Улсад суугаа ЭСЯ мэдээллээ.
