АНУ-ын Охайо мужийн Кливленд хотод байрлах “Rock and Roll Hall of Fame” буюу рок-н-роллын алдрын танхим хэмээх дуу хөгжмийн музейд мөнхлөгдөх уран бүтээлчдийн нэрс ням гараг /2025.04.27/-т тодорсон байна.
Энэ жил нийт 14 нэр дэвшигч өрсөлдсөнөөс долоон хамтлаг, уран бүтээлч рок-н-роллын алдрын танхимд нэрээ үлдээж, мөнхлөгдөх уран бүтээлчдээр тодорсны нэг нь Сиэттл хотоос гаралтай, алдарт “Soundgarden” гранж рок хамтлаг аж.
Америкийн Сиэттл хотоос үүсэлтэй гэгддэг гранж рок хөгжмийн урсгалыг домогт “Nirvana” хамтлаг 1990-ээд оны эхээр дэлхийд түгээж байсан бол “Soundgarden”, “Alice In Chains”, “Pearl Jam”, “Stone Temple Pilots”, “Mudhoney”, “Tad”, “Bush” зэрэг энэхүү урсгалаар уран бүтээлээ туурвидаг маш олон хамтлаг тус хотоос төрөн гарсан байдаг.
“Soundgarden” хамтлаг 1984 онд Сиэттл хотноо байгуулагдсан бөгөөд студийн бүрэн хэмжээний нийт зургаан цомог гаргасан байдаг. Хамтлагийн дуучин Крис Корнелл 2017 онд нас барснаар хамтлаг тарсан байдаг ч 2019 онд ганц удаа дахин нэгдэж, тоглож байсан юм.
Тус хамтлагийн хувьд өмнө нь 2020 болон 2023 онд рок-н-роллын алдрын танхимд нэрээ үлдээхээр нэр дэвшиж байсан бол ийнхүү гурав дахь удаагаа нэр дэвшихдээ сонгогдоод байна. Тус хамтлагийг энэ жил нэр дэвшүүлэх үеэр “Nirvana”, “Pearl Jam” гэх зэрэг дараа дараагийн гранж рок хамтлагууд гарч ирэх замыг зассан, дуу хөгжмийн нөлөө бүхий хамтлаг хэмээн онцолж байсан юм.
Рок-н-роллын алдрын танхимд энэ жил “Soundgarden” хамтлагаас гадна “Bad Company”, “Outkast”, “The White Stripes” хамтлагууд, дуучин Чабби Чеккер, Жо Кокер, Синди Лопер нар мөн нэрээ мөнхлөхөөр болжээ.
