"Утасны анд" энэ удаа "Номин талст " хамтлагийн дуучин А.Хаянхярваатай холбогдлоо.
-Сайн уу. "Утасны анд" байна. Энэ өдрийн мэндийг хүргэе?
-Чамд ч гэсэн энэ өглөөний мэнд хүргэе.
-Шинэ өдөр эхэлж байхад нэлээн дуу муутай байх чинь. Зүгээр үү?
-Зүгээр ээ. Гадуур ажилтай явна.
-Нууц биш бол ямар ажил амжуулж байгаа юм бэ?
-Хувийн ажлаар хүнтэй уулзах ёстой. Бас хөөцөлдөх ганц, нэг ажил бий. Өнөөдөр гадаа нэлээд хүйтэн байгааг хэлэх үү. Зорьсон ажлаа бүтээчихвэл санаа амрах гээд байна.
-Та машинаар явж байна уу. Хамгийн ойрхон юу харагдаж байна ?
-Машинтай явж байна. Сургуульдаа явах хүүхдүүд, зам хөндлөн гарах хүмүүс харагдаж байна.
-Дандаа машинаар явдаг юм уу. Хамгийн сүүлд хэзээ автобусанд суусан бэ?
-Өөрөө хувийн унаатай болохоор ойр зуурын ажлаа амжуулчихдаг юм. Одоо унаагүй бол ажил амжуулахад хэцүү болсон үе шүүдээ. Энэ их түгжрэлийг яана.
-Хавар болохоор зөвхөн эмэгтэйчүүд гоёдог гэсэн ойлголт ард хоцорсон. Таны хувьд хаврын гоёлоо сонгож амжсан уу?
-Хавар өөрөө урин дулаан цагийн эхлэл учраас аль болох гэгээлэг, хөнгөн хувцас өмсөхийг хүсдэг. Миний хувьд дажгүй хүрэм, нарны шил байхад хангалттай санагддаг юм. Түүнээс бүсгүйчүүд шиг брэнд, үнэтэй хувцас өмсөнө гэж гүйх дургүй. Биед эвтэйхэн, надад таалагдсан бол болоо.
-Анх хамтлагаараа уран бүтээл хийж эхлэхдээ урт шар үстэй байсан санагдах юм. Эргээд үсээ ургуулъя гэж боддог уу?
– Анх хамтлаг байгуулагдсан үе л дээ. Бүгд л өөр өөрийн имижийг бүрдүүлэх шаардлагатай болсон. Тухайн үед урт үс моодонд орж байлаа. Урт үс надад дажгүй зохидог юм шүү/инээв/.
– Урлагийн зарим эрчүүдийг нүүрээ буддаг гэх юм билээ. Таньд тийм тохиолдол гарч байв уу?
-Клипний зураг авалт, телевизийн нэвтрүүлэгт орохдоо нүүрнийхээ өө сэвийг дарах гэж нүүрээ будах тохиолдол гардаг. Тэрчинь урлагийнхны үүрэг шүү дээ. Бусдын нүдэнд дандаа ил байдаг учраас эрэгтэй гэлтгүй өөртөө анхаарал тавих нь зүй ёсны хэрэг.
-Та гольф сайн тоглодог. Анх удаа Азийн наадамд оролцоно гэж сонссон?
-Гольфоор хичээллээд багагүй хугацааг өнгөрөөлөө. Манайд эрчимтэй хөгжиж байгаа спортын нэг гэж боддог юм. Азийн спортын наадамд оролцох эрхтэй болсон шүү.
