69 дэх удаагаагийн “Eurovision” дууны уралдааныг өнөө жил тавдугаар сарын 13-17-ны өдрүүдэд зохион байгуулж, ялагчийг тодруулах гэж байна.
Өнөө жилийн уралдааныг дүрмийн дагуу өнгөрсөн жилийн ялагч болох Швейцар улсын Базель хотод зохион байгуулна. 2024 оны “Eurovision” уралдаанд Швейцарын оролцогч Nemo “The Code” хэмээх дуугаараа түрүүлсэн билээ.
Уралдааны эхний хагас шигшээ шат мягмар гарагт, хоёр дахь хагас шигшээ пүрэв гарагт, харин ялагчийг тодруулах шувтаргын шат бямба гарагт болно. Энэ жилийн уралдаанд нийт 37 орны оролцогчид өрсөлдөхөөр болжээ.
Хоёр жил өнжсөний дараагаар Монтенегро улс энэ жилийн уралдаанд эргэн ирж байгаа бол өмнө нь оролцохоо мэдэгдсэн Молдов улс эдийн засгийн шалтгааны улмаас нэрээ татсан байна. 37 орны хамтлаг, дуучид оролцох хагас шигшээ шатнаас 26 орны оролцогчид шувтаргын шатанд тунаж үлдэх юм байна.
Энэ жилийн оролцогчдын уран бүтээлүүдийг багтаасан цомог дөрөвдүгээр сарын 18-нд цахим хэлбэрээр, дөрөвдүгээр сарын 25-нд CD хувилбараар гарсан бол энэ сарын 23-нд пянзаар худалдаанд гаргахаар болжээ.
2025 оны “Eurovision” уралдааныг Европын өргөн нэвтрүүлгийн холбоо, Швейцарын өргөн нэвтрүүлгийн корпорац хамтран зохион байгуулна. Тус уралдааныг албан ёсны “YouTube” сувгаараа шууд дамжуулна.
