Энэ тавдугаар сарын 16-18-ны өдрүүдэд уламжлалт “Номын баяр” Сүхбаатарын талбайд болж байна. Үндэсний бичиг соёл, номын өдрүүд болон 37 дахь удаагийн Номын баяр Монгол Улсын Ерөнхийлөгч У.Хүрэлсүхийн ивээл дор “Илүү их уншъя” уриатайгаар болж буй юм. Бас нэг онцлог нь Номын баярын өмнөхөн Улаанбаатар хотыг Дэлхийн номын нийслэлд нэр дэвшүүлэхийг ЮНЕСКО-ийн Монголын Үндэсний комисс дэмжжээ. Номын баярын санаачлагч, ерөнхий зохион байгуулагчаар “Номын соёлт ертөнц” ТББ, хамтран зохион байгуулагчаар Монгол Улсын Ерөнхийлөгчийн Тамгын газар, ССАЖЗЯ, БОУАӨЯ, Нийслэлийн Засаг даргын Тамгын газар, Нийслэлийн Соёл урлагийн газар ажиллаж байгаа юм. Номын салбарт 20 дахь жилдээ ажиллаж буй “Номын соёлт ертөнц” ТББ, тэдний үүсгэн байгуулсан “Либро Сувд” агентлаг гадаад харилцааг олон улсын түвшинд өргөтгөн тэлэх ажлыг хариуцан ажиллаж, монгол зохиолчдын зохиол бүтээлийг гадаадын уншигчдад эх хэл дээр нь орчуулан хүргэх, монголын оюуны сангаас экспортлох ажлыг эхлүүлж байгаа нь нэгэн чухал алхам болж байна. Энэ удаагийн баярт ОХУ, БНХАУ, БНСУ-аас зохиолч, хэвлэн нийтлэгчид ирж оролцох юм.
Энэ удаагийн Номын баярын онцлогоос дурдвал, үндэсний бахархалт амьтан “Мазаалайн асрууд”-ыг бэлдэж, нэр хүндтэй зохиолчидтой биечлэн уулзах, номын чиглэсэн судалгаанд оролцох, чөлөөт орон зайд кофе, цай ууж номын тухай яриа дэлгэн суух тусгай орчныг уншигчдадаа зориулан засаж буй юм. Мөн иргэд, хүүхэд залуучуудыг номтой нөхөрлүүлэх, эерэг хандлага бий болгох, ном хэвлэлийн салбарын үйл ажиллагаа, нийтийн уншлагыг дэмжин сурталчлах зорилгоор номын үзэсгэлэн, зохиолч-уншигчдын уулзалт, гадаад дотоодын хэвлэлийн газруудын уулзалт, номын маркетинг-борлуулалтын уулзалт, шинэ номын нээлт, “Байгаль экологийн 50 ном”-ын танилцуулга, хүүхдэд зориулсан номын хөтөлбөр зэрэг олон талт үйл ажиллагаанууд болно. Баярын өдрүүдээр “Зөв мэдлэгт хөтөлнө” уриан дор олон сэдэв, агуулгатай номыг уншигчдад харьцангуй хямд үнээр хүргэх, уншигч зохиолчдыг уулзуулах, номтой холбоотой гэгээн дурсамж бүтээх орон зай, цаг хугацааг бүрдүүлж өгдөг уламжлалтай. Энэхүү баяр нь жилээс жилд өргөжин тэлж, ойролцоогоор 300 мянга гаруй уншигч хүрэлцэн ирж, 200 гаруй хэвлэн нийтлэгч, 300 илүү зохиолч, орчуулагч, редактор, зураач, эх зохиогч, эрдэмтэн судлаач тогтмол оролцдог болжээ.
