Монголын зохиолчид БНХАУ-ын Бээжин хот дахь Монголын Элчин сайдын яамны дэргэдэх Соёл, мэдээллийн төвд номын өдөрлөг зохион байгуулав.
Энэ үеэр Монгол Улсын Соёлын гавьяат зүтгэлтэн, зохиолч, яруу найрагч Б.Сарантуяа, Монголын номын баярын санаачлагч, зохион байгуулагч “Номын ертөнц” сэтгүүлийн эрхлэгч Б.Сувд нар Бээжин хотноо суралцаж буй оюутан, судлаач, мөн ажиллаж, амьдардаг монгол иргэддээ зориулан уулзалт хийлээ. Мөн Боловсролын судалгааны үндэсний хүрээлэн, “Либро сувд” утга зохиолын агентлаг, “Нэпко”, “Бэрх”, МУИС, “Забесс”, “Ангир” зэрэг хэвлэлийн газрын төлөөлөл оролцож халуун дулаан яриа өрнүүлэн, яруу найраг, уран бүтээлийн дээжээс толилууллаа.
Түүнчлэн ЭСЯ-ны номын санд “Номын ертөнц” сэтгүүлийн дугаарууд, 2025 оны “Мэргэн ном”, “Шилдэг ном” болон хэвлэн нийтлэгчдийн сүүлийн үеийн шинэ номын дээжээс хандивлав.
Ташрамд дурдахад, 2024 онд Бээжингийн олон улсын номын үзэсгэлэнд Хятадын дотоодын 550 номын хэвлэлийн аж ахуйн нэгж болон гадаадын 1050 байгууллага оролцсон байна. 1986 онд үүсгэн байгуулсан энэхүү үзэсгэлэн дэлхийн ном хэвлэлийн хоёр дахь том үзэсгэлэн болжээ.
