Монголын хип хоп урлагийг үүсгэн байгуулагчдын нэг “Icetop” хамтлаг Америкийн алдарт “Old School” хип хоп хамтлаг “Onyx”-той хамтарсан “Шүтээн минь” тоглолтоо Төв цэнгэлдэх хүрээлэнд наймдугаар сарын 8-нд хийх гэж байна.
Жинхэнэ хэмнэл, шүүлтүүргүй “rhymes”, эрч хүч, гудамжны хип хоп соёлын уур амьсгалыг эл тоглолтоор мэдрүүлэх аж. “Аавуудын өдөр”-ийг тохиолдуулан хийж буй уг тоглолт нь бүтэн зургаан цагийн турш үргэлжлэх юм байна.
Тоглолтын үеэр хамтлагийн ахлагч Б.Оргил-Эрдэнэ агсанд зориулан “Никитон” хамтлагийн дуучин Б.Батчулуунтай хамтран цоо шинэ уран бүтээл хийснээ толилуулах аж. Түүнчлэн тоглолтын үеэр талийгаач Б.Оргил-Эрдэнэ, Э.Хатанбаатар нарын сэтгэл хөдөлгөм мөчүүдийг хиймэл оюун ухаан ашиглан шүтэн бишрэгчидтэй нь уулзуулах юм байна.
“Icetop” хамтлагийн гишүүн С.Чулуунбаатар “Бидний бага наснаасаа сонссон, даган дуурайж, дуунд нь дурлаж сонсож ирсэн “Onyx” хамтлаг Америкаас ирж байгаа. Мөн бидэнтэй хамт байдаг дүү нар, найзууд тоглолтод оролцох болно. Найруулагчаар “Skin” энтертайнментын Б.Анар ажиллаж байгаа. Бид энэ удаагийн тоглолтоо урт хугацаанд бэлдэж байгаа учраас маш сайн болно гэж бодож байна. Төлөвлөсөн бүх дуугаа тоглолтын цагтаа багтааж дуулахаар хичээнэ. Тиймээс тоглолт цагтаа эхэлнэ. Бид хуучны хит дуунуудаасаа дуулна. Чадварлаг амьд хөгжмийн хамтлагтай хамтран “Уйлах эрхгүй хайр” гэх мэт зарим хитээ дуулна. Өмнөх уран бүтээлүүдээсээ шигшиж сонгосон 25 дуу дуулахаар байгаа. Харин шинэ уран бүтээлүүдээ наадмын дараа цацна” гэлээ.
