“Black Sabbath” хамтлагийн гоцлол дуучин Оззи Осборн 76 насандаа таалал төгссөн талаар түүний гэр бүл мягмар гарагт /2025.07.22/ мэдэгдсэн байна.
Харанхуйн хунтайж, хүнд металлын загалмайлсан эцэг гэгддэг түүний гэр бүлийнхэн мэдэгдэлдээ “Өнөө өглөө бидний хайртай Оззи Осборн таалал төгссөн тухай мэдээ хүргэж байгаадаа үгээр илэрхийлшгүй их гунигтай байна. Тэрбээр гэр бүлийнхээ хамт, хайр энэрлээр хүрээлүүлсэн байсан” гэжээ.
Жон Майкл Осборн 1948 онд төрсөн бөгөөд Английн төв хэсэгт орших Бирмингем хотод ажилчин ангийн гэр бүлийн зургаан хүүхдийн дөрөв дэх хүүхэд ажээ. Тэрбээр багадаа дислекси буюу унших, бичихтэй холбоотой сэтгэл зүйн хөгжлийн эмгэгээр шаналж, 15 настайдаа сургуулиа орхиж, хар ажил хийж байжээ. Тэр ч байтугай нэг удаа хулгайн хэргээр богино хугацаанд шоронд хоригдож байсан гэнэ.
Оззи Осборны хөгжмийн замнал 1970-аад онд хүнд металл жанрын “Black Sabbath” хамтлагийн ахлагчаар эхэлсэн байна. “Paranoid”, “War Pigs”, “Sabbath Bloody Sabbath” зэрэг хит дуунууд нь хамтлагийг алдаршуулжээ. Түүнийг шүтэн бишрэгчид нь “Харанхуйн хунтайж”, “Хүнд металлын загалмайлсан эцэг” гэж тодорхойлдог байв.
Оззи Осборн төрөлх Бирмингем хотод үдэлтийн тоглолтоо хийснээсээ хойш хоёр долоо хоногийн дараа таалал төгсжээ. “Энэ бол хамгийн сүүлчийн дуу. Та бүхний дэмжлэг биднийг гайхалтай амьдралаар амьдрах боломжийг олгосон… Та бүхэндээ чин сэтгэлээсээ баярлалаа” гэж Оззи Осборн “Black Sabbath” хамтлагийн хамгийн алдартай дуу болох “Paranoid” дуугаар тоглолтоо дуусгасныхаа дараа цугласан олонд хандан хэлжээ.
