Монгол, хятад, манж судлаач эрдэмтэн Эрих Хэйнишийн удирдлагаар их зохиолч Д.Нацагдоржийн зохиосон герман, монгол хэлний толь бичгийг шинэчлэн хэвлүүлэх төсөлд гурван улсын их сургуулийн судлаачид хамтран ажиллаж байна. Тодруулбал, МУИС-ийн дэргэдэх Монгол судлалын хүрээлэнгийнхэн ХБНГУ-ын Боннын болон БНЧУ-ын Карлын их сургуулийн судлаач, монголч эрдэмтэдтэй энэ чиглэлээр хамтран ажиллаж буй аж.
Монголын орчин үеийн уран зохиолыг үндэслэгчдийн нэг, их зохиолч Д.Нацагдоржоор “овоглодог” энэхүү толь бичгийн эх хувилбар нь Эрих Хэйнишийн төрөлх нутаг ХБНГУ-д, Боннын их сургуулийн Монгол, төвөд судлалын тэнхимийн номын санд хадгалагддаг. Тус номын санг үүсгэн байгуулсан Вальтер Хайссиг нь Д.Нацагдоржид нэгэн үе багшилж байсан Эрих Хэйнишийн шавь байсан учир монголч эрдэмтэн гар бичмэлийг түүнд өгсөн байх магадлалтай хэмээн үздэг гэнэ. Толь бичгийг шинэчлэн хэвлүүлснээр эрдэм шинжилгээний эргэлтэд оруулж, монгол судлалд үнэтэй хувь нэмэр болно гэж судлаачид үзэж байна.
