Хоёрхон чавхдастай морин хуураар Монгол Улсын нэрийг гаднын улс оронд өргөж яваа Дэлхийн ардын урлагийн их наадмын гранпри, Шубертийн нэрэмжит уралдааны тэргүүн байрын шагналт, Соёлын тэргүүний ажилтан, морин хуурч Д.Шинэцог хөгжмийн дөрвөн зохиолчийн морин хуурт зориулж бүтээсэн сонгодог бүтээлүүдийг энэ сарын 21-ний 19.00 цагт Төрийн ордонд эгшиглүүлнэ.
Төрийн шагналт, урлагийн гавьяат зүтгэлтэн Б.Шарав, Төрийн шагналт З.Хангал, Б.Мөнхболд, Олон улсын хөгжмийн зохиолчдын наадмын шагналт Ш.Өлзийбаяр нарын бүтээлээс сонордуулах тоглолтыг Төрийн шагналт, гавьяат жүжигчин Д.Сосорбарат найруулж, урлагийн гавъяат зүтгэлтэн, Улсын филармонийн уран сайхны удирдаач Н.Бүтэнбаяр удирдаж, Улсын филармонийн симфони оркестр оролцох юм.
Энэ орой 40-50 морин хуураар үзэсгэлэн гаргах аж.
Ерөнхийлөгч, Ерөнхий сайд, хөгжим судлаачид, хөгжмийн зохиолчдыг урьсан уг тоглолтыг 800 хүн үзэх гэнэ.
Д.Шинэцогоос зарим зүйлийг тодрууллаа.
-Таны тоглолт тун сонирхолтой санагдлаа. Энэ тоглолтын санааг яаж олсон бэ?
-Анхныхаа тоглолтдоо Монголынхоо сор болсон зохиолчдын бүтээлийг нэг дор эгшиглүүлэхсэн гэж эртнээс бодсон. Энэ миний анхны тоглолт, нэг дор хөгжмийн дөрвөн зохиолчийн бүтээл тоглож байгаараа Монголдоо анхдагч болж байгаа.
-Дөрвөн зохиолчийн бүгээл хоорондоо мэдээж адилгүй байх?
-Илэрхийлэх гэсэн санаа, аялгуу, хөг аяс бүх зүйлээрээ тэс өөр бүтээлүүд байгаа. Дөрвөн улирал гэж хэлж болох юм.
-Дөрвөн өөр ертөнцөд нэвтэрч тэнд байгаа хөг эгшгийг үзэгчдэд дамжуулна гэдэг хэцүү биш үү. Энэ талаар?
-Эрвээхэй нэг цэцэгнээс нөгөө рүү нисэх шиг нэг хөгжмийн зохиолчийн дотоод ертөнцөөс өөр хөгжмийн зохиолчийн орон зай руу шилжих нь тун хэцүү л дээ. Морин хуурчийн болоод удирддаачийн, хөгжимчдийн авьяас уран чадвар үзэгчдэд танигдана. Тиймээс бэлтгэлээ маш сайн базааж байгаа.
Т.Болор-Эрдэнэ
