Дорнод аймгийн Дашбалбар сумын хуучин музейн сан хөмрөгт тулгуурлан байгуулсан Буриад өв соёл судлалын музейг өчигдөр нээж, олон нийтэд танилцууллаа. Эл музейн ажлыг 2019 онд эхлүүлсэн ч цар тахал, санхүүжилтийн хүндрэлээс шалтгаалан ашиглалтад оруулах хугацаа нь хойшилсоор ийнхүү таван жилийн дараа буюу Дашбалбар сумын түүхт 100 жилийн ойгоор хүлээлгэн өгч буйг орон нутгийн удирдлагууд нь мэдээлэв.
Дашбалбар сумын музей нь үзмэрийн сан хөмрөгөөрөө баялагт тооцогддог бөгөөд Ардын зураач Г.Одонгийн эх бүтээлүүд, археологийн ховор олдворууд, буриад зоны өв соёл, ахуй амьдралтай холбоотой олон арван эдлэл хэрэглэлийг хадгалж ирсэн. Тэгвэл шинэ музейд эдгээр үзмэрийг төрөлжүүлэн байршуулаад буй аж. Музейн барилгын гаднах хананд буриад ястныг бүрдүүлдэг Хори хэмээх гол овогт харьяалагддаг Галзууд, Хуасай, Батанай, Сагаангууд, Бодонгууд зэрэг аймгийн нэрийг кирил, монгол бичгээр сийлж, бэлгэдэл бүхий дүрсээр чимжээ.
