Хятадын технологийн компаниуд хиймэл оюуны илүү ухаалаг, хямд шийдлүүдийг эрчимтэй хөгжүүлж байна. Тэдний нэг болох “Z.ai”-ын шинээр хөгжүүлж буй GLM-4.5 хэмээх загвар нь өрсөлдөгч “DeepSeek”-ийнхээс хямд өртгөөр ашиглах боломжтой байх бөгөөд “agentic AI” буюу даалгаврыг автоматаар дэд даалгаварт хуваан илүү оновчтой гүйцэтгэх чадвартай технологид суурилжээ. Мөн энэхүү загвар нь нээлттэй эх үүсвэртэй тул хөгжүүлэгчид үнэ төлбөргүй татан авч, ашиглах боломжтой юм.
GLM-4.5 нь “DeepSeek”-ийн загвараас даруй хоёр дахин жижиг хэмжээтэй бөгөөд АНУ-ын экспортын хязгаарлалтад нийцүүлэн Хятадад зориулан тусгайлан бүтээсэн “Nvidia”-ийн H20 загварын ердөө найман чипээр ажиллах хүчин чадалтай аж. “Z.ai”-ийн зүгээс одоогоор нэмэлт чип худалдан авах шаардлагагүй, хангалттай тооны тооцоолох нөөцтэй гэдгээ мэдэгдсэн ч сургалтын өртгийн талаар дэлгэрэнгүй мэдээлэл өгөөгүй байна.
Тус загварын хувьд 1 сая оролтын токен боловсруулах зардал 0.11 ам.доллар, харин 1 сая гаралтын токен боловсруулахад 0.28 ам.доллар ногдох аж. Харин “DeepSeek” энэхүү үнийг 0.14 болон 2.19 ам.доллароор тооцдог бол “Alibaba”-ийн “Moonshot”-ын “Kimi K2” загварын тариф 0.15 ба 2.50 ам.доллар байгаа юм.
