Монгол ардын уламжлалт соёлын нэгэн чухал өв болох бий биелгээг залуу хойч үед өвлүүлэн таниулах зорилго бүхий “Монгол бий биелгээ” наадмыг энэ сарын 16-17-ны өдрүүдэд Увс аймгийн Улаангом суманд зохион байгуулахаар болжээ. Уг наадам нь Соёлын биет бус өвийн жагсаалтад 2009 онд бүртгэгдсэн “Монгол ардын бүжиг, бий биелгээ”-ний оршин тогтнох чадварыг бэхжүүлэх, түгээн дэлгэрүүлэх зорилготой. Наадмыг ЮНЕСКО-ийн Соёлын биет бус өвийн сан, Соёл, спорт, аялал жуулчлал, залуучуудын яам, Соёл, урлагийн их сургуулийн Соёлын сургууль хамтран зохион байгуулж байна. Наадмын хүрээнд бий биелгээ, ихэл, товшуур, шанз зэрэг уламжлалт урлагийн төрлүүдээр өвлөн уламжлагчид болон залуу авьяастнуудын дунд уралдаан зохиогдож, шилдгүүдийг шалгаруулах юм. Тус үйл ажиллагаа нь “Монгол бий биелгээг өвлүүлэн уламжлуулж, оршин тогтнох чадварыг бэхжүүлэх нь” төслийн хүрээнд зохион байгуулагдаж буй бөгөөд Монголын өв соёлыг түгээн дэлгэрүүлэх чухал алхам хэмээн зохион байгуулагчид онцолж байна.
“Монгол бий биелгээ” наадам Увс аймагт болно
