Сэлэнгэ аймгийн Алтанбулаг суманд байрлах аймгийн Нэгдсэн музейн барилга нь дэлхийд хоёр, Ази тивд ганцхан байдаг музейн зориулалтаар барьсан барилга гэдгээрээ онцлогтой. Тус музейг виртуал технологиор шинэчилж, өчигдөр /2025.08.07/ хүлээлгэн өглөө.
Музей нь орчин үеийн нөхцөл, хөгжил дэвшилтэй хөл нийлүүлж виртуал музей болсноор сонирхогчид газар дээр нь ирж үзэхээс гадна зайнаас үзэх хүмүүсийн тоо нэмэгдэнэ.
Виртуал технологиор дамжуулан Шивээ хиагт, ардын хувьсгалын үйл явдал, тухайн үеийн “цайны зам”-ын гол дамжин өнгөрөх бүс байсан “Маймаачин” хотын түүхэн үйл явдал зэргийг тухайн цаг үед нь очсон мэт бодит мэдрэмжийг авах юм.
Мөн энэхүү ажил нь орчин цагийн шинэлэг технологиор дамжуулан хүүхэд залуучуудад эх түүхээ таниулах, жуулчдад түүхэн цаг үеийг сурталчлах томоохон ач холбогдолтой болж байгаа.
Энэ үеэр эрдэмтэн, доктор Д.Энхбаяр Герман улсын Гутенбергийн номын санд хүсэлт тавьсны дагуу одоогийн Алтанбулаг сум буюу 1830-аад оны Монголын хиагт буюу Маймаачин хотын эх зургийг буулган музейн хамт олонд гардуулан өглөө. Энэхүү зураг нь манай улсад байхгүй түүхийн чухал холбогдол бүхий зураг гэдгээрээ онцлогтой болжээ.
Түүнчлэн музейн дэглэлт, шинэчлэлтийн ажилд том үүрэг гүйцэтгэсэн ШУА-ын эрдэмтэн, түүх судлаач, доктор Д.Эрдэнэбат болон МУИС-ын профессор “Digital solutions” ХХК-ийн захирал А.Энхбаяр нарыг аймгийн Засаг даргын жуух бичгээр шагналаа.
