“Egshin artger” урлангаас хүүхдийн унших дур сонирхлыг хөглөж, мэдлэгийн хүрээг тэлэх, сэтгэхүйг нь хөгжүүлэх зорилготой “Мэдлэгийн арал” нэртэй уран зохиол, танин мэдэхүйн шинэ цогц хөтөлбөр хэрэгжүүлэхээр болжээ. Уншиж, бичих сонирхолтой, адал явдал, мэдлэгт дурлагч 6-12 насны хүүхдүүд болон тэдний эцэг, эх, асран хамгаалагч, багш, сурган хүмүүжүүлэгч нарт зориулсан энэхүү хөтөлбөрийн танилцуулах өдөрлөг энэ сарын 10, 12-нд “Egshin аrtger” урлангийн байранд зохиогдох нь. Энэ бол зөвхөн номын хөтөлбөр биш, таны хүүхэд номоор дамжуулан уран зохиол, шинжлэх ухаан, түүх, соёл, байгаль ертөнцийн олон содон сонин зүйлстэй танилцаж, өөрийгөө нээн илэрхийлэх чадвараа хөгжүүлэх гайхалтай аяллын эхлэл байх болно гэдгийг зохион байгуулагчид онцолжээ. Хүүхэд багачуудын эрдэм мэдлэгт дурлах итгэлийг асааж өгснөөр аливаад шинжлэх ухааны үүднээс ул суурьтай ханддаг, боловсролын мөн чанарыг ухаж ойлгодог ирээдүйн иргэд төрөн гарах үндэс болдог байна. Хүүхдийнхээ хөгжлийн үе шат бүрд эцэг, эхчүүдийн төдийлөн цаг зав гарган, тайлбарлан ойлгуулж, танин мэдүүлж чаддаггүй асуудлыг хэрхэн шийдэх аргыг эндээс мэдэх боломжтой гэнэ.
Уран зохиол, танин мэдэхүйн “Мэдлэгийн арал” хөтөлбөрийг хэрэгжүүлнэ
