“Gallup” судалгааны байгууллага өчигдөр АНУ-ын насанд хүрсэн иргэдийн согтууруулах ундааны хэрэглээтэй холбоотой санал асуулгын үр дүнгээ нийтэлжээ. Тус байгууллага “Consumption Habits” нэртэй судалгаагаа сүүлийн 90 орчим жилийн хугацаанд жил бүр явуулж ирсэн юм. 2023 онд энэ үзүүлэлт 62 хувь, 2024 онд 58 хувь байсан юм. Өмнөх хамгийн доод үзүүлэлт нь 1958 оны 55 хувь байжээ.
Цар тахлаас хойш архины хэрэглээ буурч байгаа нь инфляц, үнийн өсөлт хүмүүсийн орлого зарлагад нөлөөлж байгаатай холбоотой гэж үздэг. Нөгөө талаар согтууруулах ундаа үйлдвэрлэгчдэд эрүүл мэндийн байгууллагуудын үзүүлдэг дарамт шахалт нэмэгдсэнтэй холбоотой. Үүний нэг илрэл нь тохируулж уух ч эрүүл мэндэд хортой гэж үздэг америкчуудын эзлэх хувь 53 болсноос харагдаж байна. Өнгөрсөн онд ингэж боддог хүмүүсийн эзлэх хэмжээ 45 хувь байсан юм.
Байнга хэрэглэдэг хүмүүсийн эзлэх хэмжээ түүхэн доод хэмжээнд хүрч буурсан байна. Тухайлбал өдөр бүр амсдаг гэж хариулсан хүмүүсийн хэмжээ 23 хувь болсон нь түүхэн доод үзүүлэлт болжээ. Эсрэгээрээ долоогоос дээш хоногийн өмнө хамгийн сүүлд уусан хүмүүсийн хэмжээ 40 хувьд хүрсэн нь 2000 оноос хойших хугацааны хамгийн өндөр үзүүлэлт болсон байна.
Хүмүүсийн долоо хоногт уудаг дундаж тоо 2.8 болсон нь 1996 оноос хойших хугацааны хамгийн доод хэмжээ болжээ. Жилийн өмнө энэ үзүүлэлт 3.8 байсан бол 2003 онд 5.1 хүрсэн нь түүхэн дээд үзүүлэлт болж байв. “Архины хэрэглээ буурсан нь хүмүүсийн сэтгэл санааг өөрчилдөг бусад бодис, тухайлбал АНУ-ын бараг тал орчимд нь хуулиар зөвшөөрөгддөг марихуаны хэрэглээ өссөнтэй холбоотой бололтой” гэж Gallup байгууллагын нийгмийн судалгаа хариуцсан захирал Лидиа Саад хэлжээ.
“Gallup” нь 1939 оноос хойш Америкчуудын архины хэрэглээтэй холбоотой зан үйлийг судалж эхэлсэн юм. 2001 оноос хойш энэ судалгаандаа тохируулж уух нь эрүүл мэндэд ямар нөлөөтэй талаар санал асуулга оруулж эхэлжээ.
