Швейцарт төвтэй International Workplace Group-ийн жил бүр гаргадаг судалгаагаар Японы Токио хотыг дэлхийн хамгийн шилдэг “ажил+амралт” /“workation” буюу work+vacation/ хослуулсан хотоор нэрлэжээ.
Судалгаанд 40 өөр хотын оффисын уян хатан цагийн боломж, визийн хүртээмж, интернетийн чанар, байгальтай ойр байдал зэрэг олон хүчин зүйлийг үндэслэсэн байна.
Токио нь “асар хурдтай интернет, тээврийн дэд бүтэц, аюулгүй байдал, соёл мөн шинээр нэвтрүүлсэн дижитал нүүдлийн виз”-ээрээ бусад хотыг тэргүүлжээ.
Япон улс 2024 оны дөрөвдүгээр сард дижитал нүүдлийн визийн хөтөлбөр эхлүүлсэн. Энэ нь бусад улс орнуудаас Японд очиж ажиллахыг хүсэж буй ажиллах хүчнийг татах зорилготой юм.
Энэ визийн шаардлага нь жилийн орлого 10 сая иен /68 мянган ам.доллар/ ба түүнээс дээш байх бөгөөд гадаадын иргэд Японд хамгийн ихдээ зургаан сар ажиллах боломжтой.
51 улсын иргэд энэ визийг мэдүүлэх боломжтой ба ихэнх тохиолдолд эхнэр, нөхөр, хүүхдүүдийг нь хамт оруулдаг байна. Эдгээр улсын тоонд Монгол байхгүй.
Өнгөрсөн жил энэ жагсаалтыг Унгарын Будапешт хот тэргүүлж байв. Энэ судалгаанд хамруулах хотуудын тоо жил ирэх тусам нэмэгдсээр байгаа юм.
Жагсаалтын эхний 10 байр:
-
Токио (Япон)
-
Рио де Жанейро (Бразил)
-
Будапешт (Унгар)
-
Сөүл (БНСУ)
-
Барселона (Испани)
-
Бээжин (Хятад)
-
Лиссабон (Португал)
-
Ром (Итали)
-
Парис (Франц)
-
Валлетта (Мальта)
