Монгол Улсын Соёл, спорт, аялал жуулчлал, залуучуудын яам, “Google” компанитай хамтран залуучуудын дижитал ур чадварыг дэмжих зорилготой “Grow with Google Mongolia” олон улсын хөтөлбөрийг албан ёсны эрхтэйгээр 350 залуучуудад 3 сарын турш амжилттай хэрэгжүүлж өндөрлөлөө.
“Grow with Google Mongolia” хөтөлбөр нь олон улсын түвшний 6 чиглэлийн сургалтыг салбар салбартаа хүлээн зөвшөөрөгдсөн багш нараар ахлуулан бататгах хичээлүүдийг зааж, манай улсын хөдөлмөрийн зах зээл болон дотоодын хүний нөөцийн ур чадварын хэрэгцээ шаардлагатай уялдсан хөтөлбөрийг боловсруулсан бөгөөд энэ жилийн хөтөлбөрийн онцлог нь бүх мэргэжлийн сургалтууд хиймэл оюуныг ашиглах агуулгаар баяжуулсан явдал юм.
Монгол Улсын Засгийн газрын гишүүн, Соёл, спорт, аялал жуулчлал, залуучуудын сайд Ч.Ундрам хэлсэн үгэндээ “…Тус хөтөлбөрийг дахин Монгол Улсад хэрэгжүүлж буй нь залуучуудын хөгжлийг дэмжих үндэсний зорилтыг бодит үйл хэрэг болгоход чиглэсэн чухал алхам боллоо. Залуучуудад олон улсад хүлээн зөвшөөрөгдөх мэдлэг, практик чадвар олгох, манлайлал, оролцоо, дижитал ур чадварыг дэмжих хүртээмжтэй, шинэлэг арга барилуудыг нэвтрүүлэхээр зорьж байгаа.” хэмээн онцоллоо.
Энэхүү хөтөлбөр хэрэгжих хүрээнд төр засаг, хувийн хэвшил болон залуучууд бүгд хамтдаа цахим ур чадварт суурилсан ирээдүйг цогцлоох үндсэн зорилгын дор нэгдэж буйгаараа онцлог ба бид залуучуудыг хөгжлийн үр шим хүртэгч бус, хамтран бүтээгч байхад нь дэмжлэг үзүүлэн ажиллаж байна.
