Найруулагч Ц.Хүсэлбаатар, Гавьяат жүжигчин С.Өлзийхүү нарын отгон хүү Х.Сумъяадорж “Хиртээгүй сарнай”, “Сорил”, “Эргэх учрал”, “Дайрлага”, “Өвлийн идэш”, “Хүлээх өрөө” зэрэг бүрэн хэмжээний уран сайхны кино, мөн “Бүлэг”, “Бид нэг гэр бүл”, “Өв залгамжлагч”, “Амьдрах сайхан” зэрэг телевизийн олон ангит киноны гол болон туслах дүрд тоглоод буй.
Түүнчлэн өнгөрсөн оны гуравдугаар “Монгол” театрын “Клеопатра” сонгодог драмын жүжгийн Октавиан жанжны дүрээр мэргэжлийн тайзнаа анхлан гарч, үргэлжлүүлэн аравдугаар сард “Маск” продакшны “Масктай Монгол” хошин шоу тоглолтод оролцсон. Хамгийн сүүлд тэрбээр Монголын анхны түүхэн, детектив “Мөрч” олон ангит киноны дүрээр үзэгчидтэй “уулзсан”.
Харин есдүгээр сарын 19-нөөс тэрбээр “Татар” хамтлагийн өөрсдийн бодит түүхээс сэдэвлэн бүтээсэн “TATAР” уран сайхны киноны гол дүрээр кинотеатруудын дэлгэцээр үзэгчидтэй “уулзана”. “ТАТАР” киног “Татар” хамтлаг, “Аранжин пикчерс”, “Promix sound”, “Red point media”, “SO media” хамтран бүтээжээ. Киноны зохиолыг А.Миеэгомбо, Т.Билгүүн, Л.Ариунболд нар бичиж, ерөнхий найруулагчаар Б.Батдэлгэр ажилласан байна. Гол дүрүүдэд жүжигчин, реппер Gangaa буюу Д.Ганбат, жүжигчин Х.Сумъяадорж, Н.Түвшин, Б.Тэмүүжин, Б.Балжинням нар тогложээ.
