Загварын салбарын тэргүүлэх хэвлэлүүдийн нэг болох Америкийн “Vogue” сэтгүүлийн ерөнхий редакторын албан тушаалд Клои Малл томилогдохоор болсныг сэтгүүлийн зүгээс мэдэгджээ. Өдгөө 39 настай Клои Малл сүүлийн 14 жилийн турш тус сэтгүүлд тасралтгүй ажиллаж байна. Анх гэрээт сэтгүүлчээр ажилд орж байсан тэрбээр албан тушаалын шат ахисаар саяхныг хүртэл сэтгүүлийн албан ёсны Vogue.com вебсайтын ерөнхий эрхлэгч, мөн сэтгүүлийн “The Run Through” подкастын хөтлөгчийн алба хашиж байсан юм.
Клои Малл нь Францын кино найруулагч Луи Малл, Америкийн жүжигчин Кендис Берген нарын охин бөгөөд Парис, Лос Анжелес хотуудын хооронд бага нас нь өнгөрсөн тэрбээр ажлын гараагаа “New York Observer” сонинд үл хөдлөхийн талаар мэдээ, нийтлэл бичин эхлүүлж байжээ.
Ийнхүү “Vogue” сэтгүүлийн ерөнхий редактораар 37 жил тасралтгүй ажилласан Анна Винтур өнгөрсөн зургаадугаар сард албан тушаалаа өгч буйгаа зарласнаас хоёр сар гаруйн дараа уг нэр хүндтэй, хариуцлагатай албан тушаалд томилогдох хүн тодорч, “Vogue” сэтгүүлийн шинэ эрин үе Клои Маллын удирдлаган дор эхлэхээр болж байна.
Клои Малл өөрийгөө “Vogue” сэтгүүлийн бүхий л алба хэлтэст ажиллаж байснаа дурьдаж, “Vogue” сэтгүүл өнөөдрийн намайг бүтээсэн учраас сэтгүүлийнхээ цаашдын хөгжил цэцэглэлтийг хариуцаж ажиллахаар болсондоо үнэхээр таатай, баяртай байна” гэжээ.
Анна Винтур ч мөн түүнийг “Vogue” сэтгүүлийн өнгөрсөн түүх болон ирээдүйд чиглэсэн шинэ үйл ажиллагаан тэнцвэрийг хадгалж чадах хүн гэдгээ батлан харуулсан болохыг онцолжээ.
Хэдийгээр Анна Винтур сэтгүүлийн ерөнхий редакторын ажлаа өгсөн боловч тус хэвлэлийн газрын контент хариуцсан ахлахын албан тушаалд үлдсэн бөгөөд “Vogue” сэтгүүл болон компанийн бусад бүтээгдэхүүн болох GQ, “Wired”, “Tatler” зэрэг сэтгүүлийн контентыг хариуцан ажилласаар байгаа юм.
