Дэлхийн тэргүүлэгч стриминг платформ “Netflix” ирэх аравдугаар сард нээлтээ хийх “Physical: Asia” шоунд өрсөлдөх орнуудыг албан ёсоор зарлалаа. Энэхүү шоу нь 2023 онд цацагдсан “Physical: 100” цувралын өргөжүүлсэн, олон улсын хувилбар бөгөөд үзэлтээрээ олон оронд тэргүүлж, үзэгчдийг татаж чадсан юм.
“Physical: Asia” шоуны анхны трэйлэр есдүгээр сарын 2-нд “Netflix”-ийн албан ёсны хуудаснаа цацагдаж, оролцох найман улсыг зарлаад буй. Үүнд, Монгол, Австрали, Филиппин, Тайланд, Өмнөд Солонгос, Япон, Индонез, Турк улс багтсан байна.
“Ази тивийн шилдэг тамирчид хүч чадал, тэсвэр хатуужлаа сорин өрсөлдөнө. Эцэст нь аль улс тугаа мандуулах бол?” хэмээн тус бичлэгт дурдаад буй. Оролцогч улсын дунд Монгол Улсын төрийн далбаа багтсан нь манай улсын үзэгчид дунд өндөр хүлээлт үүсгэж, хэн байх бол гэсэн асуулт цахим орчноо тараад байна.
“Physical: Asia” шоу нь өмнөх хоёр улирлаас өөр байх бөгөөд үндэсний багийн тогтолцоогоор зохион байгуулагдана. Энэ улиралд тамирчид хувь хүний бус, улсынхаа нэрийн өмнөөс өрсөлдөх бөгөөд багийн нэг гишүүн ялагдсан тохиолдолд тухайн улсын бүх тамирчин хамтдаа тэмцээнээс хасагдах дүрэмтэй. Иймээс өрсөлдөөн илүү ширүүн, тэмцлийн үнэ цэн илүү өндөр байх юм.
