Монголын дүрслэх урлагийн түүхэнд ул мөрөө тодоор тамгалсан, Төрийн соёрхолт, Ардын зураач Үржингийн Ядамсүрэнгийн мэндэлсний 120 жилийн ойг угтан “Урлахуйн өв” гэр бүлийн үзэсгэлэнг Урчуудын эвлэлийн галерейн танхимд олны хүртээл болгож байна.
Энэ сарын 10-ныг дуустал толилуулах эл үзэсгэлэнд түүний гэргий, зээгт наамалч Я.Люня болон үр хүүхдүүд, дүрслэх урлаг, дизайны “Анима” сургуулийн үе үеийн төгсөгчдийн бүтээлүүдийг дэлгэснээрээ онцлогтой.
Гурван үеийн уран бүтээлчдийн өв, тус тусын арга барил, дотоод ертөнцийг дэлгэн харуулах “Урлахуйн өв” үзэсгэлэнгээс түүний охин Я.Туяагийн аавынхаа гэгээн дурсгалд зориулан 2002 онд урласан “Ядамсүрэн” хөргийг тольдох боломжтой. Тэрбээр аавынхаа гарт хөөрөг атгуулж, ширээн дээр зургийн хэрэгслийг нь өрж, дүрслэхдээ дархны ур ухаан, дүрс¬лэх урлагийн гоц авьяас, шашин, номын эрдэмдшамдан суралцсан бодь хүмүүн байсныг нь илтгэхээр зорьжээ.
Мөн Ү.Ядамсүрэн агсны 1984 онд урласан “Зонхов”, БНМАУ-ын зээгт наам¬лын эх хувь тэргүүтэй ховор, нандин олон бүтээлийг тус үзэсгэлэнд толилуулжээ.
Монголын Уран зургийн галерейд дүрслэх урлагийн хосгүй үнэт бүтээлээр шалгарсан таван бүтээл бий. Үүнд, Марзан хочит Б.Шаравын 1921 онд туурвисан В.И.Лениний хөрөг, Төрийн шагналт, Ардын зураач Н.Цүлтэмийн “Талын айл”, Г.Одонгийн “Ажлын дараа”, О.Цэвэгжавын “Азарганы ноцолдоон”, Ү.Ядамсүрэнгийн “Өвгөн хуурч” бүтээл багтдаг билээ.
Ардын зураач Ү.Ядамсүрэн бол Монголын орчин үеийн дүрслэх урлагийн тулгын чулууг тавилцсан шилдэг уран бүтээлчдийн нэг байсан. Түүний “Өвгөн хуурч”, “Өрх гэрийн эзэн”, “Үхэр сүрэг”, “Нөхөрлөл”, “Зоригт хүмүүс” зэрэг бүтээл уран зураг сонирхогч, урлаг судлаачдын мэлмийг олон жилийн туршид мялаасаар ирсэн. Тэрбээр монгол болон бар зураг, торгон зээгт наамал, тосон будаг тэргүүтэй дүрслэх урлагийн олон төрлөөр бүтээлээ туурвидаг байсан бөгөөд үндэсний болон орчин үеийн өрнийн уран зургийн арга барилыг хослуулан эзэмшсэн нэгэн байв.
