Альтернатив рок урсгалаар уран бүтээлээ туурьвидаг Английн алдарт “Radiohead” хамтлаг долоон жил завсарласны эцэст Европын хотуудаар аялан тоглохоор болжээ. Тус хамтлаг хамгийн сүүлд 2018 онд АНУ-д тоглолтоо хийсэн. Түүнээс хойш хамтлагийн ахлагч, дуучин Том Йорк, гитарчин Жонни Гринвуд нар “The Smile” хэмээх өөр хамтлагийнхаа уран бүтээлд анхаарал хандуулж, тоглолтоо хийсээр ирсэн юм.
Тэгвэл “Radiohead” хамтлагийн бөмбөрчин Филип Селвэй лхагва гарагт инстаграм хуудсаараа дамжуулан, өнгөрсөн жилээс хойш хамтлаг аялан тоглолтын бэлтгэлдээ орж, хамтдаа бэлдэж байгаа талаар мэдээлжээ. Мөн тэрээр одоогийн байдлаар Европын таван хотын хуваариуд тодорхой болсныг дурдаад, цаашдаа нэмэгдэж ч магадгүй хэмээн хэлсэн байна.
Хамтлагийн аялан тоглолтыг илтгэх нууцлаг зарын хуудаснууд Европын томоохон хотуудын гудамжинд тараагдаж, байшин барилгын ханан дээр наагдаж эхэлсэн байна. “Radiohead” хамтлаг арваннэгдүгээр сарын 4, 5, 7, 8-нд Испанийн Мадрид хотын “Movistar Arena” цогцолборт, арваннэгдүгээр сарын 14, 15, 17, 18-нд Италийн Болонья хотын “Unipol Arena” цогцолборт, London, UK арваннэгдүгээр сарын 21, 22, 24, 25-нд Их Британийн нийслэл Лондон хотын “The O2” цэнгэлдэхэд, арванхоёрдугаар сарын 1, 2, 4, 5-нд Данийн нийслэл Копенгаген хотын “Royal Arena” цогцолборт, арванхоёрдугаар сарын 8, 9, 11, 12-нд ХБНГУ-ын нийслэл Берлин хотын “Uber Arena” цогцолборт тус тус зохион байгуулагдах хуваарь гарчээ.
“Radiohead” хамтлагийн Европын аялан тоглолтын тасалбар есдүгээр сарын 5-ны баасан гарагаас Radiohead.com вебсайтаар худалдаанд гараад байна.
