Японы “H2L Inc.” компани Жэймс Камероны алдарт “Avatar” кинон дээр гардаг шиг хэрэглэгчдэд роботыг алсаас биечлэн удирдах боломж олгодог шинэ төрлийн капсул төхөөрөмжийг танилцуулжээ.
Төсөөлөөд үз дээ, та тухлан суугаад массажны сандал дээрээсээ өдөр тутмын ажил гэрийн ажлаа хийх боломжтой болчихвол ямар вэ? Энэ нь уран зөгнөл биш, харин бодитой шийдэл болох ирээдүй ойрхон байгаа аж.
“H2L”-ийн бүтээсэн “Capsule Interface” нь тусгай булчингийн шилжилт мэдрэгч, чанга яригч, дэлгэцтэй бөгөөд хэрэглэгчийн биеийн жижиг хөдөлгөөнүүдийг илрүүлж, робот руу дамжуулдаг. Мөн жаахан хөл хөдөлгөхөд робот алхана. Гар арай хөдлөхөд робот өргөх, түлхэх үйлдэл хийнэ. Булчингийн агшилт, суналтын маш өчүүхэн өөрчлөлтийг өндөр нарийвчлалтай мэдэрч, роботод хүч, даралт гэх мэт тактиль (арьс, мэдрэхүйгээр хүрч мэдрэх) мэдээллийг дамжуулна.
Капсул доторх дэлгэцээр дамжуулан хэрэглэгч роботын харж буй дүр зургийг бодитоор хүлээн авч, өөрийн биеийг өөр газар шилжсэн мэт мэдрэмж авдаг байна.
“H2L” одоогоор “proprioceptive feedback” буюу роботоос хэрэглэгч рүү буцаан мэдрэмж дамжуулах технологийг хөгжүүлж байна. Хэрэв энэ хэрэгжвэл хэрэглэгч зөвхөн хөдөлгөөн дамжуулахаас гадна роботод үйлчилж буй даралт, эсэргүүцлийг өөрийн биеэр мэдэрч, жинхэнэ immersive (орчинд бүрэн автсан) мэдрэмж авах боломжтой болно.
Энэ капсул төхөөрөмж зах зээлд тун удахгүй гарах бөгөөд эхний үнэ нь 30 сая иен (ойролцоогоор 208 мянган ам.доллар) байх аж. Одоогоор өргөн хэрэглэгчдэд үнэтэйд тооцогдох ч, технологи өргөжиж, эрэлт өсөхийн хэрээр үнэ буурах нь тодорхой гэж мэргэжилтнүүд таамаглаж байна.
Эх сурвалж: CAAK.mn
