Дэлхийн загварын хамгийн нэр хүндтэй арга хэмжээнүүдийн нэг Лондонгийн загварын долоо хоногт Монголын брэнд анх удаа оролцлоо.
Жилд хоёр удаа зохион байгуулагддаг Лондонгийн загварын долоо хоног нь Нью-Йорк, Парис, Миланы загварын долоо хоногтой адил дэлхийн загварын ертөнцөд шинэ чиг хандлага, өнгө төрхийг тодорхойлдог гол үйл явдлын нэг бөгөөд тус арга хэмжээнд Монголын “Anna Cashmere” брэнд өөрийн бүтээгдэхүүнээ амжилттай танилцууллаа.
1984 оноос Их Британийн Загварын зөвлөл санаачлан зохион байгуулж эхэлсэн уг арга хэмжээнд алдартай дизайнерууд, загвар өмсөгчид, хэвлэл мэдээлэл, маркетингийн нөлөөлөгчид өргөнөөр оролцдог.
Сүүлийн жилүүдэд тус арга хэмжээ нөхөн сэргээгдэх, эко материалд илүү ач холбогдол өгч буй. Энэ чиг хандлагатай уялдан Монгол ноолуурын үнэ цэнийг олон улсад таниулах зорилго бүхий “Anna Cashmere” брэнд өөрийн коллекцоор оролцсон нь онцлог байлаа.
