1995 оноос хойш 2018 оныг хүртэл 23 жилийн турш тасралтгүй зохион байгуулагдсан ‘’Victoria’s Secret’’ загварын шоу таван жил завсарлаад 2024 онд эргэн ирсэн билээ. Тэгвэл энэ жилийн загварын шоу аравдугаар сарын 15-нд уламжлал ёсоор Нью-Йорк хотноо зохион байгуулагдах гэж байна.
“Victoria’s Secret” загварын шоуны амин сүнс нь сахиусан тэнгэрүүд гэгддэг. Өнөө жилийн шоуны анхны танилцуулга сурталчилгаанд Адриана Лима, Анок Яай, Алекс Консани, Лили Алриж зэрэг загвар өмсөгчид оролцжээ. Мөн энэ жил Америкийн үндэсний эмэгтэй сагсан бөмбөгийн багийн тоглолч Анжел Рийс сахиусан тэнгэрийн хувиар шоунд оролцохоор болсон байна.
Харин энэ жилийн шоунд үзүүлбэрээ үзүүлэх уран бүтээлчдийг хоёр хоногийн өмнө албан ёсоор зарласан бөгөөд үүнд, Өмнөд Солонгосын алдарт “Twice” охидын хамтлаг, поп од Мэдисон Бийр, Латин Америкийн дуучин Кэрол Жи, алдарт реппер Мисси Эллиот нар энэ жилийн шоуны тайзнаа гарахаар багтжээ.
‘’Victoria’s Secret’’ загварын шоу аравдугаар сарын 15-ны лхагва гарагт 19:00 цагт шууд дамжуулагдах бөгөөд “Amazon Live” болон “ТикТок”, “YouTube” платформуудаас мөн шууд дамжуулалтыг үзэх боломжтой. Мөн Нью-Йорк хотын “Плаза” зочид буудал, “Таймс Скүэр”-ийн том дэлгэцээр шоуны шууд дамжуулалт гардаг уламжлалтай.
