Реалити шоуны од Кардашъяны гэр бүлийн отгон охин Кайли Женнер мягмар гараг /2025.10.14/-т “King Kylie” нэрээрээ анхны дуугаа гаргалаа.
Тэрбээр 10 жилийн өмнө Terror Jr хамтлагийн “3 strikes” дууг сурталчилгаандаа оруулж байсан юм. Энэ дуу нь интернэт хэрэглэгчдийн 2015-2016 оны үеэ дурссан бичлэг, зурагтаа ашигладаг дуу болж үлдсэн бөгөөд, одоо ч ТикТок платформ дээр трэнд хэвээр байна. Харин “Fourth Strike” дууны клип 2016 онд гарсан сурталчилгааны үргэлжлэл болсноороо онцлогтой.
Сонирхуулахад, “King Kylie” гэх нэр нь тухайн үед Кайлигийн үерхэж байсан реппер Tyga-тай холбоотой бөгөөд тэр үед Tyga өөрийгөө “King Gold Chains” гэж нэрлэдэг байжээ. Харин 2015 онд Кайли өөрийн инстаграм хаягийн нэрээ түр хугацаанд @kingkylie болгон өөрчилж байсан удаатай.
Түүнчлэн Кайли гоо сайхны брэндийнхээ арван жилийн ойд зориулан, “King Kylie” нэртэй шинэ цуглуулгаа энэ долоо хоногт мөн танилцуулсан юм. Шинээр танилцуулсан цуглуулгад нүдний тень, багснуудаас гадна брэндийн амжилтын түлхүүр болсон хуучны бүтээгдэхүүнүүд багтах аж. 