ХБНГУ-ын Веслин хотын захиргаанаас гурван жил тутамд зохион байгуулдаг олон улсын уралдаанд монголын зураач Ц.Ган-Эрдэнэ оролцож тэргүүн байр эзэлжээ.
Уралдаанд дэлхийд болоод Европт нэр хүндтэй 1000 гаруй уран бүтээлч оролцсон бөгөөд модерн, сонгодог зургууд, уран баримал, хийсвэр өгүүлэмжтэй орон зайн урлагийн бүтээл түлхүү байжээ. Уралдааны эхний шалгаруулалтаас 65 бүтээлийг сонгосноос эцсийн шатанд зураач Ц.Ган-Эрдэнийн “Усны тусгал” бүтээл шилдгээр шалгарчээ. Тэрбээр шалгарсан бүтээлүүдээрээ ирэх наймдугаар сард эх орондоо үзэсгэлэнгээ гаргахаар төлөвлөөд байгаа гэнэ.
Тэрбээр уралдаанд сойсон “Усны тусгал” бүтээлүүдээ 2009, 2011 онд зуржээ. Хүний дотоод ертөнц, хайртай хосын хагацал, дурсамжийг усны тусгалд хэрхэн харж болохыг бодож бүтээжээ.
Зураач Ц.Ган-Эрдэнэ нь 2001 онд Соёл, урлагийн их сургуулийг дүүргэж, 2003 оноос ХБНГУ-ын Мюнстер хотын Соёлын академид профессор Херманн Жосэфийн удирдлага дор суралцаж төгссөн. Энэ хугацаанд тус улсад зохион байгуулсан 20 гаруй үзэсгэлэнд оролцсон. “Анго гэрлийн тод давхцал”, “Жаргалын мөр”, “Алс нутгийн зургууд” гэх мэтчилэн 10 гаруй бие даасан үзэсгэлэнгээ гаргасан авъяаслаг уран бүтээлч юм.
www.URLAG.mn
