Японы ерөнхий сайд Санаэ Такаичийн барьсан гар цүнх 145 жилийн настай брэндийг олны анхааралд дахин шинээр оруулав. Такаичи Японы арьсан эдлэл үйлдвэрлэгч “Hamano Inc”-ийн “Grace Delight Tote” загварын цүнхийг барьж явааг гярхай нүдтэй хүмүүс ажигласан аж. Наганод төвтэй “Hamano Inc”-ийн бүтээгдэхүүнүүдийг Японы хааны гэр бүлийн гишүүд эртнээс нааш таашаан хэрэглэжээ.
Такаичигийн цүнх 136 мянган иенийн үнэтэй. Хийцийн хувьд дан арьс атлаа ердөө 700 грамм жинтэй. Мөн чамин хээнцэр хэрнээ хэрэглээнд нийцсэн гэдгээрээ давуу талтай бүтээгдэхүүн юм.
Шинэхэн ерөнхий сайдын зураг цахим сүлжээнд тарснаас хойш “Hamano Inc” зөвхөн тус цүнхний захиалгад дарагдаад байгаа аж. Захиалга хилийн чанадаас ч, дотоодоос ч орж ирж байгаа бөгөөд зарим ачаа дөрөвдүгээр сарын сүүл хүртэл хойшлогдох төлөвтэй байгааг сануулжээ.
Эмэгтэй улстөрчид сонголтоороо ялгарч, төдийлөн танигдаагүй брэндийн нэр хүндийг өсгөсөн тохиолдол ганц үүгээр дуусахгүй. Тэдний олонх нь уламжлалт тансаг зэрэглэлийн брэндийг сонгодог. Гэхдээ АНУ-ын Төлөөлөгчдийн танхимын гишүүн Александриа Окасио-Кортез 2020 онд “Telfar” брэндээс цүнх сонгосон нь жижиглэн худалдаачдад тус болж байжээ.
Санаэ Такаичигийн хувьд хүнд метал хөгжим, машин, мотоциклд дуртай учир залуу үеийн таашаалд нийцсэн улстөрч болоод буй. Харин “од” болоод буй цүнхний тухайд илүү ажил хэрэгч эмэгтэйчүүдэд таалагдаж байна. Түүнчлэн Такаичи Японы загвар зохион бүтээгч Жүн Ашидагийн хувцаснуудад дуртай. Хувцас, дагалдах хэрэгсэл сонгохдоо дан үндэсний үйлдвэрлэлээ дэмжиж буй нь түүний эх оронч үзлийн нэгээхэн илэрхийлэл гэдгийг соёлын мэргэжилтэн Накано хэллээ.
