Өнөөдөр Өмнөд Солонгосын реппер, дуучин, ая зохиогч, жүжигчин, “Big Bang” хамтлагийн гишүүн асан T.O.P буюу Чой Сын Хюн 38 нас хүрч байна.
T.O.P буюу Чой Сын Хён 1987 оны арваннэгдүгээр сарын 4-ний цас хаялсан өдөр Өмнөд Солонгосын нийслэл Сөүл хотод абстракт урлагийн уран бүтээлч Ким Хуан Гигийн гэрт мэндэлжээ. Урлагийн гэр бүлд хүү болж төрсөндөө ч тэр үү, Чой урлагтай их ойрхон өссөн байна. Тэрбээр бага наснаасаа хип хоп урлагт дурлаж, үнэнчээр сонсон, өөрөө ч оролдож байв. Чухам энэ үедээ буюу дунд ангиасаа хөрш айлын хүү Квон Жи Ён /G Dragon/-той найзалж, хамтдаа дуу дуулж, бүжиг бүжиглэдэг байсан тэд хожим хамтдаа Ази тивийг “эзэлсэн” билээ.
2006 онд Чой Сын Хюнтай нэгэн “сонин хүн” холбоо барьсан нь багын найз Квон Жи Ён байв. Тухайн үед Квон Жи Ён “YG” энтертайменттай хамтран хөвгүүдийн хамтлаг байгуулахаар боломжтой гишүүдээ хайж байжээ. Харин энэ үед Чой Сын Хюн Тempo нэрээр танигдаад байв.
Түүний шинэ тайзны нэрийг Т.О.Р болгож, G-Dragon-той хамтран “Bigbang” хамтлагийг байгуулалцаж, тэд 2007 онд анхныхаа цомгийг гаргаж байжээ.
T.O.P анхнаасаа л хамтлагийн уран бүтээлийнхээ хажуугаар бие даан уран бүтээл туурвидаг байлаа. Дууны уран бүтээлээс гадна жүжиглэж эхэлсэн бөгөөд хамгийн анх “Red Roc”-ийн “Hello” дууны клипэнд тогложээ. Цаашлаад “KBS2” сувгийн “Би бол Сэм” олон ангит кинонд тоглосноор жүжигчний замналаа эхлүүлж, 2008 онд Чой “Дангүг” их сургуулийн театрийн урлагийн тэнхимд элсэнжээ. 2009 онд “Iris” олон ангит кинонд дүр бүтээсэн нь түүнийг мэргэжлийн жүжигчин болсныг баталсан юм. Тэрбээр кинонд тоглохдоо тайзны нэрээ биш, жинхэнэ нэрээ ашигладаг аж.
Алдарт загварын сэтгүүл “Vogue”-ийн 2016 онд тодруулсан хамгийн царайлаг, халуухан 50 эрийн тоонд Азиас ганцхан эр багтсан нь өдгөө к-попын загалмайлсан эцэг “Bigbang” хамтлагийн реппер, жүжигчин T.O.P буюу Чой Сын Хюн байлаа.
2017 оны хоёрдугаар сарын 9-нд Т.О.Р цэргийн албанд татагдав. Тэрбээр шинэ цэргийн бэлтгэлээ дуусгаад Сөүлийн цагдаагийн газарт хуваарилагдан ажиллаж, 2018 оны арваннэгдүгээр сард халагдах байлаа. Гэтэл зургадугаар сард Т.О.Р хар тамхины хэрэгт холбогдсон ч цагдан хорихгүй гэх шийдвэр гарснаар шинэ дүгнэлт гартал өөр цагдаагийн дивизэд түүнийг хуваарилж ажиллуулахын зэрэгцээ хэргийг нь шалгаж эхэлжээ. Тэрхүү хэрэгт Чойг гэм буруутайд тооцож, хоёр жилийн тэнсэн харгалзах ял оноожээ. Хэргийн дараа тэрбээр цэргийн албаа дуусгахын Үндэсний батлан хамгаалах яаманд шилжин ажилласаар цэргийн албаа 2019 оны долдугаар сарын 6-нд хааж дуусгасан байна.
2018 оны гуравдугаар сарын 13-нд “Big Bang” хамтлаг “Flower road” гэх сингл цацаж, фэнүүдтэйгээ салах ёс гүйцэтгэсэн билээ. Тэрхүү сингл нь түүхэндээ хамгийн богино хугацаа буюу гурван хоног 14 цагийн дотор сая гаруй хувь зарагдаж дээд амжилт тогтоосон юм.
Харин 2019 оны гуравдугаар сарын 11-нд “Big Bang” хамтлагийн Seungru гэмт хэрэгт холбогдон, хамтлагаасаа гарч, удалгүй аравдугаар сарын 13-нд Т.О.Р шоу бизнесийг орхиж буйгаа инстаграм хуудсаараа зарлаж байв.
Удаан хугацаанд завсарласны эцэст Т.О.Р 2024 онд “Squid Game-2” цувралд тоглож, уран бүтээлдээ эргэн ороод буй.
