13 хүүхдийн эх ачлалт ээж Л.Бадамгаравтаа зориулсан С.Оюунтөгсийн тав дахь номд “Цаг хугацаагаар наадагч”, “Бүгээн чулуу” сэдэвт хоёр бүлэг 20 өгүүллэг, “Миний тоглоомын өрөө” бэсрэг тууж багтжээ. Тус номын редактор, Төрийн шагналт, СГЗ зохиолч Дарма.Батбаяр “С.Оюунтөгс яруу найрагч гэдгээ хэдийнэ баталсан төдийгүй “Цаг хугацаагаар наадагч” номоороо үргэлжилсэн үгийн зохиолч гэдгээ тунхаглалаа” хэмээн түүний номын хурим дээр сэтгэлийн үгээ хэлсэн юм.
Мөн тэрбээр “С.Оюунтөгсийн “Миний тоглоомын өрөө” нэртэй анхны туужид хот газрын нэгэн хэвийн уйтгартай “саарал” амьдралаас уйдсан бүсгүйн уйдахдаа тоглосон тоглоом нь шоглоом болж байгаа тухай гардаг. Нээрэн ч өнөөх л нэг байшингаасаа гарч, өнөөх л гудамжаараа ажилдаа очиж, өнөөх л эл дол болсон ажлаа хийчихээд буцаад өнөөх гудамжаараа, өнөөх гэр орондоо очно гэдэг уйтгартай. Аргаа бараад шатар, даам, хөзөр, даалуу тоглов ч уйтгартай. Яагаад гэвэл ийм тоглоомууд дүрэм журамтай. Яг л гудамжны улаан, ногоон гэрэл шиг…Дүрэмтэй болохоороо хязгаарлагдмал. Гэтэл “хязгааргүй” тоглоомуудад дүрэм байдаггүй. Тийм учраас өнөөгийн хүмүүс тоглодог тоглоомоосоо өөр тоглоом эрээд байгаа юм. Үүнийг С.Оюунтөгс гярхай ажигласанд нь би олзуурхаж байна. Хүн зайлшгүй тоглох хэрэгтэй. Тэгэхдээ хязгааргүй тоглоомоор тоглох нь илүү үр дүнтэй. Тийм тоглоомын нэг бол цаг хугацаагаар тоглох. Ийм бололцоог зөвхөн урлаг уран зохиол л хүнд олгож чадна. Харин цаг хугацаагаар бусдыг тоглуулахын тулд ухаан зарах учиртай. Энэ ном бол С.Оюунтөгсийн цаг хугацаагаар наадахыг хүссэн хүслийнх нь илэрхийлэл ч байж мэднэ” хэмээжээ.
