Өмнөд Солонгосын жүжигчин Пак Ми Сун үсээ хусуулсан зургаа өөрийн цахим хуудаснаа нийтлэн, хорт хавдартай тэмцэж байсан болохоо зарлалаа.
Тэрбээр саяхан оролцсон “You Quiz on the Block” нэвтрүүлгийнхээ үеэр хөхний хорт хавдартай тэмцэж байсан болохоо мэдэгдсэн тэрбээр “Би яг л Италид суралцаж, Миланд бизнес эхлүүлсэн дизайнер шиг санагдаж байна. Миний хэв маяг одоо үсээ дагаад өөрчлөгдсөн. Би өмнө нь маш эмэгтэйлэг хувцасладаг байсан бол одоо стилиэ өөрчилсөн. Эмчилгээ хийлгээд 10 сар өнгөрсөн ч эвгүй, танил бус мэдрэмж төрсөөр л байна.
Хүмүүс яагаад хиймэл үс зүүж болохгүй гэж гэж бодож байж магадгүй. Хими эмчилгээнд ороход үс маань 100 хувь бүгд унана гэж эмч хэлсэн учраас эмчилгээ эхлэхэд л би үсээ хусуулчихсан. Олон эмэгтэй үсээ хусуулахдаа уйлсан гэж би сонссон ч үс нь дахиад ургасан тухай ч мөн олон сонссон. Тиймээс надад ч бас ийм боломж тохионо гэж бодоод баяртайгаар үсээ хусуулсан” гэжээ.
Түүнд ямар шинж тэмдэг илэрч байсан тухай тэрбээр “Надад маш их ядрахаас өөр шинж тэмдэг илрээгүй. Зураг авалтын дундуур би ихэвчлэн хүлээлгийн өрөөнд дуг хийдэг байсан. Энэ нь бие маань надад дохио өгч байсан нэг хэлбэр байсан байна лээ. Би 38 настайдаа анхны хүүхдээ төрүүлсэн. Ердөө нэг сар өнгөрсний дараа л ажилдаа эргэн орсон. Хоёр дахь хүүхэд дээрээ ч мөн адил. Эргээд харахад амьдрал минь маш хурдан өнгөрчихсөн байсан.
Дараа жил надад юу тохиолдохыг мэдэхгүй байгаа ч би хэт их төлөвлөхөө больж, усны урсгал шиг амьдрахыг хичээж, хэрэгтэй үедээ амарч сурахыг хичээж байгаа” гэжээ.
