Christie’s дуудлага худалдааны төв өчигдөр /2025.11.19/ үдээс хойш дэлхийн анхны тооцоолох машин гэгддэг төхөөрөмжийг Парис хотод үнэ хаялцуулах зарах гэж байснаа цуцалжээ. Парис хотын шүүх энэхүү төхөөрөмжид экспортын хориг тавьсан тул эзэн нь дуудлага худалдааг хойшлуулах хүсэлт гаргасныг тус төв тайлбарласан байна.
“La Pascaline” гэж нэрлэдэг уг механик тооцоолуурыг 1642 онд Францын математикч Блэйз Паскаль зохион бүтээж байжээ. Ийм төхөөрөмж нийт есөн ширхэг байдгийн ихэнх нь музейд хадгалагддаг бөгөөд хувь хүний гар дээр байдаг цорын ганц хувилбарыг нь зарах гэж байсан юм.
Christie’s төв үүнийг “дуудлага худалдаанд орсон шинжлэх ухааны хамгийн чухал дурсгал”, “хүний оюуны ажлыг машинаар орлуулах анхны оролдлого” гэж нэрлээд 2-3 сая еврогийн үнэ хүрэх таамаг дэвшүүлж байв.
Хэсэг эрдэмтэд “La Pascaline”-ийг Францын “үндэсний үнэт зүйл” гэж үзээд яаралтай хориг тавих хүсэлтийг Парисын шүүхэд гаргасан юм байна. Францын соёлын яам өнгөрсөн тавдугаар сард журмын дагуу энэ төхөөрөмжид экспортын зөвшөөрөл олгож байжээ. Уг зөвшөөрлийг олгох шийдвэрийг Үндэсний Урлаг, Гар Урлалын Төвийн нэг, Луврийн музейн нэг мэргэжилтний хамтран гаргасан дүгнэлт дээр үндэслэн гаргасныг яам мэдээлжээ. Гэвч хориг тавихыг хүссэн эрдэмтэд уг шийдвэрийг цуцалж, “La Pascaline” төхөөрөмжийг Франц улсын “үндэсний үнэт зүйлс” ангилалд оруулахыг шаардсан байна.
Блэйз Паскаль уг төхөөрөмжийг татварын орлого цуглуулах, бүртгэх ажил хийдэг аавдаа туслах зорилгоор дөнгөж 19 настайдаа зохион бүтээсэн гэдэг.
Шүүхийн эцсийн шийдвэр хэдэн сарын дараа гарах төлөвтэй байгааг эх сурвалжууд мэдээлжээ.
