К-попын анхны үеийн хамтлагуудын нэг “H.O.T.” хамтлаг 30 жилийнхээ ойн хүрээнд ирэх жил эргэн ирэх гэж байна. Хамтлаг өнгөрсөн амралтын өдрүүдээр бүрэн бүрэлдэхүүнээрээ нэгдэн “Hanteo Music Festival”-д уран бүтээлээ толилуулсан нь зургаан жилийн дараах анхны нэгдэл байв. Хамтлаг хамгийн сүүлд 2019 оны есдүгээр сард бүрэн бүрэлдэхүүнээрээ буюу тавуулаа Сөүлийн “Gocheok Sky Dome”-д тоглосон юм.
“Hanteo Music Festival” Инчон дахь “Inspire Arena”-д болсон бөгөөд к-попын домог болсон тус хамтлагаас гадна “2AM”, “Teen Top”, “Solar of Mamamoo”, “Oh My Girl”, “fromis_9”, “tripleS”, “Identity” хамтлагууд оролцжээ.
“H.O.T.”-ийн гишүүн Кангта тоглолтын талаарх сэтгэгдлээ ярихдаа “Өөр өөр үеийн уран бүтээлчид нэг тайзнаа гарна гэдэг амаргүй. Залуу үетэйгээ хамт уран бүтээлээ толилуулсандаа талархахын зэрэгцээ сэтгэл их хөдөллөө” гэжээ.
“H.O.T.” хамтлаг 1996 онд “SM Entertainment”-ийн удирдлага дор дебют хийж байв. Тэднийг орчин үеийн к-поп урлаг хэлбэр дүрсээ олоход томоохон хувь нэмэр оруулж, замыг нь зассан уран бүтээлчид гэж үздэг.
