Анхдугаар Үндсэн хуулиа баталж, Бүгд Найрамдах Улсаа тунхагласны түүхт 101 жилийн ойг тохиолдуулан Монгол Улсын Ерөнхийлөгч Ухнаагийн Хүрэлсүх зарлиг гарган нэр бүхий эрхмүүдэд төрийн дээд цол, одон, медаль хүртээлээ.
Улсын филармонийн Морин хуур найрал хөгжмийн морин хуурч, хөөмийч Нэргүйн Ашид Монгол Улсын Гавьяат жүжигчин цол, тэмдгээр шагнууллаа.
Н.Ашид нь Монголын болон гадаадын хамтлаг, уран бүтээлчидтэй хамтран 20 гаруй цомог гаргаж, Японы эзэн хааны ордноос эхлээд Швейцарийн Женев хот дахь НҮБ-ын танхим, ХБНГУ-ын Берлиний филармонийн концертын их танхим, АНУ-ын Нью-Йорк хотын НҮБ-ын Ерөнхий Ассамблейн хурлын танхим гээд дэлхийн 40 гаруй орны нэр хүндтэй тайзнаа гоцлон болон хамтран тоглож, Монголын язгуур урлагийг дэлхийд таниулахад үнэтэй хувь нэмрээ оруулж яваа уран бүтээлч юм.
