“Apple”-ийн дэлхий даяарх тээвэрлэлтийн хэмжээ 14 жилийн дараа анх удаа “Samsung”-ийг гүйцэж түрүүлжээ. “Counterpoint Research”-ийн мэдээлснээр, “Apple” энэ онд дэлхийн өнцөг булан бүрт 243 сая бүтээгдэхүүн нийлүүлсэн бол “Samsung” 235 саяыг нийлүүлсэн байна. Түүнчлэн дэлхийн ухаалаг гар утасны зах зээлийн 19.4 хувийг “Apple”, 18.7 хувийг “Samsung” эзэлж байна.
Тээвэрлэлт гэдэг нь жижиглэнгийн сувгуудад нийлүүлсэн бүтээгдэхүүний тоог хэлнэ. Энэ нь борлуулалтыг тооцоогүй тоо гэсэн үг юм. Гэсэн ч энэ тооцоолол нь ухаалаг гар утасны эрэлт болон хүлээлтийн талаар нэгийг өгүүлэх болов уу.
Түүнчлэн “iPhone 17” худалдаанд гарсан үе нь хэрэглэгчийн худалдан авалтын ерөнхий мөчлөгтэй таарч байгаа аж. Тодруулбал, Covid-19 цар тахлын үеэр шинэ утас худалдан авсан хүмүүсийн утсаа солих хугацаа нь яг өдийд таарч байгааг “Counterpoint Research”-ийн ахлах шинжээч Ян Ван хэллээ.
“Apple” брэнд 2029 он хүртэл тэргүүн байраа хадгалах төлөвтэй байгааг ч мөн шинжээчид онцолж байна. Үүнтэй холбогдох хэд хэдэн шалтгааныг доорх байдлаар нэрлэв. Нэгдүгээрт, 2023 оноос 2025 оны эхний хагас хүртэлх хугацаанд 358 сая ширхэг хуучин “iPhone” утас зарагджээ. Тэгэхээр энэ хэрэглэгчид ямар нэг байдлаар ирэх жилүүдэд утсаа шинэчилнэ гэсэн үг. Хоёрдугаарт, АНУ, Хятадын тарифын дайн үйлдвэрлэгчдэд санаснаас бага нөлөө үзүүлсэн. Өөрөөр хэлбэл, энэ нь “Apple”-д ашигтай байж, өргөн хүрээтэй нийлүүлэлтийн сүлжээ болон хөгжиж буй зах зээл зэрэг зарим бүс нутгийн өсөлтөд нь тусалжээ. Гуравдугаарт, ам.долларын ханш суларсан уян хатан эдийн засгийн төлөв “Apple”-д ашигтай туссан байна.
“Apple” ирэх онд “iPhone 17e” болон нугардаг загварын шинэ утсаа танилцуулах төлөвтэй байна. Бүтээгдэхүүний нэр төрөл өргөжсөнөөр тус брэнд хэрэглэгчийн түвшин бүрт эрэлтийг хангаж, байр сууриа бэхжүүлэх бололтой.
