Томуу, томуу төст өвчнөөс урьдчилан сэргийлэх арга хэмжээний хүрээнд Монголын хүүхдийн ордноос амралтын хугацааг наашлуулж, “Харшийн сүлд модны наадам”-ыг теле хэлбэрээр хүргэхээр болжээ.
1958 онд байгуулагдсанаас хойш жил бүр зохиогдож ирсэн хүүхэд багачуудын хүсэн хүлээдэг уламжлалт “Харшийн сүлд модны наадам” энэ жил тасалдахгүй. Гэхдээ олон нийтийн эрсдэлийг бууруулах үүднээс орчин үеийн технологийн шийдлээр баяжуулсан теле контент хэлбэрээр хүргэхээр болжээ. Ийнхүү 67 дахь удаагийн баярын наадам телевиз болон цахим сувгаар хүрэх юм.
Мөн Хүүхдийн ордны дугуйлангуудын өвлийн амралт анх 2025 оны арванхоёрдугаар сарын 22-нд эхлэхээр төлөвлөгдсөн байсан ч нөхцөл байдалтай холбогдуулан 2025 оны арванхоёрдугаар сарын 12-ноос амралтад гаргахаар шийдвэрлэв. Амралтын хугацаанд орох байсан хичээлээс хоцрогдохгүй байх үүднээс хаврын улиралд хичээлийн үргэлжлэх хугацааг сунган нөхөж зохион байгуулахыг мэдэгдэлд дурджээ.
