Соёл, спорт, аялал жуулчлал, залуучуудын сайдын тушаалаар Монгол Улсын Төрийн шагналт, Ардын уран зохиолч С.Дашдооровын мэндэлсний 90 жилийн ойг 2025 онд тэмдэглэн өнгөрүүлж байгаа билээ.
Ойн арга хэмжээний хүрээнд Соёл, спорт, аялал жуулчлал, залуучуудын яам, Засгийн газрын хэрэгжүүлэгч агентлаг Соёл, урлагийн газар, Монгол Улсын үндэсний номын сан, Монголын зохиолчдын эвлэл, “Дашдооров судлал” төв ТББ хамтран дараах арга хэмжээг зохион байгууллаа.
• С.Дашдооров судлал, шинжлэлийн улсын II уралдаан,
• С.Дашдооровын ном бүтээл, гэрэл зураг, зохиолын эх бичвэрийн үзэсгэлэн
• С.Дашдооров судлал, шинжлэлийн улсын II уралдаанд түрүүлсэн бүтээлүүдийн илтгэл
• Нэрт зохиолчийн шилмэл бүтээлүүдийг англи хэлээр орчуулах зэрэг олон ажлыг хийж, “Утга зохиол, урлаг” сонины тусгай дугаарыг хэвлэн гаргасан юм.
Ийнхүү нэрт зохиолчийн 90 жилийн ойг отголж “С.Дашдооров судлал, шинжлэлийн улсын II уралдааны өгүүллийн эмхэтгэл” болон зохиолчийн шилдэг 10 өгүүллэгийн англи орчуулгын түүвэр болох “The Boundless World” номуудыг уншигчдын хүртээл болголоо. Номын нээлт Монголын Үндэсний номын санд болов.
Нээлтийн үйл ажиллагаанд С.Дашдооров зохиолчтой хамтран ажиллаж, ойр дотно нөхөрлөж явсан үе үеийн уран бүтээлчид, судлаач, их дээд сургуулийн багш нар оролцсон юм. ССАЖЗЯ-ны санхүүжилтээр хэвлэгдсэн тус хоёр бүтээлийг Монгол Улсын Үндэсний Номын сан, Хүүхдийн төв номын сан, Д.Нацагдоржийн нэрэмжит Улаанбаатар хотын нийтийн төв номын сан, 21 аймгийн нийтийн номын сангууд болон МУИС, МУБИС, СУИС, ШУТИС зэрэг их дээд сургуулийн номын сангуудад хандивлалаа.
