Монголын анхны алтернатив рок, инди хамтлагуудын нэг “Шөнийн галт тэрэг” хамтлаг “Хайлсан шоколад” бие даасан тоглолтоо толилуулах гэж байна.
Энэхүү тоглолт нь тус хамтлагийн хамгийн сүүлд бүрэн хэмжээний тоглолтоо хийснээс хойш гурван жилийн дараах тоглолт юм. Энэ хугацаанд “Шөнийн галт тэрэг” хамтлагийнхан 10 дуутай хоёр дахь цомгоо гаргаж, шинэ уран бүтээлүүдээ хүргээд буй.
“Шөнийн галт тэрэг” хамтлагийн “Хайлсан шоколад” бие даасан тоглолт гэгээн Валентины өдрөөр буюу ирэх хоёрдугаар сарын 14-нд “M Bank Arena”-д болно.
“Хайлсан шоколад” тоглолтын тасалбарыг shoppy.mn-ээс авах боломжтой.
Ташрамд дурдахад, энэ 2026 онд “Шөнийн галт тэрэг” хамтлагийн 25 жилийн ой тохиож буй юм. Тус хамтлаг байгуулагдсанаасаа хойш 2004 онд “Цэнхэр шувуу” цомгоо гаргаж тухайн жилдээ “Acoustic evening” тоглолтоо, 2006 онд “Их завсарлага UB Palace”, 2010 онд “Их завсарлага C1” тоглолтуудаа сонсогчдодоо хүргэсэн. 2022 онд “Шөнийн галт тэрэг” пянзаа гаргаж бүрэн хэмжээний бие даасан тоглолтоо хийсэн бөгөөд мөн шинэ цомгоо гаргасан юм.
