Австрийн суут хөгжмийн зохиолч Вольфганг Амадей Моцарт мэндэлсний 270 жилийн ойг тохиолдуулан Монгол Улсын Филармонийн Симфони оркестр нэгдүгээр сарын 27-нд В.А.Моцартын бүтээлүүдээс тоглох гэж байна.
Концертыг Австри улсын тэргүүн зэргийн удирдаач Матиас Флецбергер удирдах аж.
Хөтөлбөр:
- Overture “Cosi fan tutte”
- Bassoon Concerto in flat major, K. 191/186e
- Symphony No. 36 in C major, K. 425 “Linz”
Вольфганг Амадей Моцартын тухай сонирхолтой баримтуудаас дурдвал,
- 12 улсын хэлийг ойлгодог
Австри гаралтай хөгжмийн зохиолч тэрээр Герман, Итали, Англи, Франц хэлээр чөлөөтэй ярьдаг байжээ. Мөн Испани, Орос, Латин, Голланд, Чех, Польш болон Турк зэрэг хэлний тодорхой хэмжээний мэдлэгтэй байдаг байсан. В.А.Моцартыг эртний Грек болон Библийн еврей хэлийг ойлгодог байсан байж магадгүй талаар олон эрдэмтэд бичиж үлдээсэн байна.
- Хэт үрэлгэн байдал
Тэрээр худалдан авалт хийх дэндүү дуртай байсан бөгөөд олсон мөнгөнийхөө ихэнхи хувийг материаллаг зүйлс худалдан авахад зарцуулдаг муу зуршилтай байсан. Одоогийн ханшаар жилд дунджаар 42,000$ олдог байсан ч санхүүгийн менежмент муу, үрэлгэн байдлаасаа болоод насныхаа төгсгөлд зардлаа дийлж чадахгүй байдалд хүрсэн байна.
- Зургаан хүүхдийн эцэг
В.А.Моцарт зургаан хүүхдийн эцэг болсон ч дөрвөн хүүхэд нь нялх байхдаа зуурдаар нас барсан юм. Тэдний эрт нас барсан талаар тодорхой шалтгаан байхгүй ч энэ нь XVIII зууны хүнд хэцүү цаг үетэй холбоотой байж магадгүй гэж үздэг. Үлдсэн хоёр хүүхдийнх нь аль нь ч үр хүүхэдтэй болоогүй нь алдарт хөгжмийн зохиолч В.А.Моцартын удам үүгээр төгсгөл болсон юм.
