Монгол Улсын Ардын уран зохиолч, Соёлын гавьяат зүтгэлтэн, Хэл бичгийн ухааны доктор, сэтгүүлч Үржингийн Хүрэлбаатар өөрийн уран бүтээл, сүүлийн үе хэвлүүлсэн номын дээжээс Хүүхдийн төв номын санд өнөөдөр /2026.01.17/ хандивлалаа.
Тэрбээр “Тархины фитнес” хайку шүлгийн түүвэр, “Өлзийт өглөөний мэнд”, “Гоо марал” хүүхдийн туужийн түүвэр, “Гоомаралын адал явдал: Өвөө зээ хоёр”, “Гоомаралын адал явдал: Эмээ зээ хоёр”, “Цахим өгүүллэг”, “Оршил”, “Бясалган дуулах уу”, “Чи байх гэвэл шилдэг нь бай”, “Ухааралт өглөөний мэнд”, “Хязгаар үгүй” зэрэг нийт 11 нэрийн 120 гаруй ном, мөн япон, солонгос хэлний 300 орчим сурах бичиг, ном бүтээлүүдийг тус номын санд хандивласан байна. Эдгээр ном нь уншигч хүүхэд багачуудын оюуны хөгжилд үнэтэй хувь нэмэр оруулах юм.
Хандивын үеэр Ү.Хүрэлбаатар “Ном уншин сууж буй хүүхдүүдийг хараад үнэхээр их баярлаж байна. Номонд дуртай байна гэдэг нь өөрийгөө хайрлаж, өөрийгөө үнэлж, хөгжүүлж чаддаг, зорилготой хүүхдүүд гэдгийг илтгэнэ. Би өөрөө 9–10 дугаар ангид байхдаа Улаанбаатар хотын цөөхөн хэдэн номын сангаар тогтмол үйлчлүүлж, сууж ном уншдаг байлаа. Номын сантай нөхөрлөсөн тэр үеийн ертөнц миний амьдралын зам мөрийг үндсэндээ тодорхойлсон гэж боддог. Тиймээс өнөөдөр миний амьдралд сайхан учрал тохиосон, онцгой өдөр. Учир нь энэ өдөр миний ууган охин болон ууган зээ охины минь төрсөн өдөр давхцдаг тул билэгшээн, өөрийн хамгийн дуртай газар болох Хүүхдийн номын санд уран бүтээлээ бэлэглэж байна” хэмээн сэтгэгдлээ хуваалцлаа.
