Нийслэлийн Аялал жуулчлалын газар, “Скай резорт” ХХК хамтран “Улаанбаатарын өвлийн наадам 2026”-ыг нэгдүгээр сарын 31-нээс хоёрдугаар сарын 1-ний хооронд “Скай резорт” цанын баазад зохион байгуулна.
Тусгай сонирхлын аялал жуулчлалыг хөгжүүлэх, жуулчны улирлын хугацааг уртасгах, өвлийн улиралд жуулчдын тоог нэмэх, иргэдийн амралт, чөлөөт цагийг зөв боловсон өнгөрүүлэхээр 14 дэх жилдээ зохион байгуулж буй энэ үйл ажиллагаа нь ёс заншил, өв уламжлал, дахин давтагдашгүй өвөрмөц соёлыг сурталчлах, өвлийн улирлын экстрим спорт, аяллын төрлийг дэмжих зорилготой юм.
Наадмын үеэр мөсөн сурын харвааны олон улсын аварга, мөсний шагайн улсын аварга шалгаруулах, Улаанбаатар хотын снөүбоард, уулын шүхэр, цасны регби, уулын цана, кёрлингийн аварга шалгаруулах, мөсөн хананд авиралтын сонирхогчдын болон гэр бүлийн буухиа, олс таталт, аялал жуулалын салбарын оюутнуудын дунд “Гранд тур” тэмцээн зохион байгуулахаар төлөвлөөд байна.
Мөн сонирхогчдод зориулан шүхэр, монгол банхар, шувуулахуйн үзүүлбэр, хоол унд, цана, чарганы үйлчилгээ, урлагийн тоглолт хийх ажээ.
Наадамд нийслэл болон 21 аймгийн 1000 гаруй баг тамирчин оролцохоос гадна БНХАУ-ын ӨМӨЗО, Шинжаан Уйгар, ОХУ-ын Буриад, Халимаг, Тува, Казакстан, АНУ-аас монгол туургатны 50 гаруй тамирчин оролцохоор бүртүүлжээ.
