Өвөрхангай аймгийн Богд сумын 4 дүгээр багийн нутагт оршдог, эртний галавын үед далай тэнгисийн сав газар байсан ул мөрийг хадгалсан, үелж тогтсон өвөрмөц бүтэцтэй газрыг Өөш шахлаг хэмээн нэрлэнэ.
Унаган байгалийн үзэсгэлэнт төрх, ан амьтан, ургамлын эко системийн зохицол бүрдсэн энэ газар жуулчдын анхаарлыг ихээхэн татдаг бөгөөд эндээс үлэг гүрвэлийн яс, чулуужсан амьтан, дун, загасны хайрс зэрэг палеонтологийн олдвор ихээр илэрдэг байна.
Мөн Өөш шахлаг ба Мээм толгойн хооронд оршдог Шар хөвийн хоолойд “Илжгэн чихт хааны хэрэм” хэмээх түүхэн дурсгал бий.
Энэхүү хэрэм нь бэхлэлт хэлбэрээр босгосон 10 гаруй км урт шавар, чулуун бүтээл бөгөөд домогт өгүүлснээр “Илжиг шиг урт чихтэй, ууртай хэрцгий хаан байжээ. Тэр урт чихнээсээ ичдэг учир үсээ урт ургуулж нуудаг байсан бөгөөд үсээ засуулаад тэр дор нь цаазалдаг заншилтай байв. Гэвч нэг арга зальтай үсчин цаазаас мултарч, хааны нууцыг олонд дэлгэсэн” хэмээн өгүүлдэг ажээ.
Хэрмийг нимгэн хар хүрмэн чулуугаар барьсан тул барилга, архитектурын дурсгалд ангилагддаг. Өөш шахлаг ууланд Монгол Улсын Улаан номд орсон аргаль, янгир, хар сүүлт, мануул, үнэг, хярс, дорго зэрэг олон төрлийн ан амьтан бий.
Одоогоор энэхүү үзэсгэлэнт газарт тогтмол үйл ажиллагаа явуулдаг жуулчны бааз байхгүй тул малчид түрээсийн гэрээр жуулчдад үйлчилдэг байна.
