Баянхонгор аймгийн Түүх, угсаатны зүйн музейн алтан сан хөмрөгт 960 сорьцтой мөнгөн таван хошуу малын дүрс, мөнгөн самбар, мөнгөн бүслүүр бүхий хувин хадгалагдаж байна.
1945 онд мал сүргээ 1000 хүргэсэн 97 малчинд “Улсын алдарт сайн малчин” цол олгох үеэр тус шагнал дагалдсан бөгөөд музейд хадгалагдаж буй хувин нь Баянхонгор аймгийн Өлзийт сумын харьяат Улсын сайн малчин Н.Дооломын “Улсын алдарт сайн малчин” шагнал юм. Шагналын хувинг түүний хүү Д.Бүдшир аймгийн музейд бэлэглэж байжээ.
Монголчууд мал сүрэг нь өсөж мянга хүрэхээр үр төлөөр баян байхыг бэлгэдэн эцэг малын дүрсийг модоор сийлж, мөнгө, зэс зэрэг металл эдээр цутгуулан бурхан тахилынхаа өмнө залдаг байв.
1943 онд хуралдсан Улсын сайн малчны хоёрдугаар зөвлөгөөнд Ерөнхий сайд Х.Чойбалсан малаа 1000, 5000 хүргэсэн малчдыг онцгойлон сайшааж, гэрт нь үүрд дурсгал болох зүйлээр шагнахыг санал болгож байжээ.
МАХН-ын Төв хороо, БНМАУ-ын Сайд нарын Зөвлөл 1944 оны есдүгээр сарын 22-ны өдөр хувийн мал сүргээ 1000, 5000, 10000 хүртэл өсгөсөн малчдад “Улсын алдарт сайн малчин” цол олгож, үнэт эд өлгийн гурван зэрэгтэй шагнал дурсгах тухай тогтоол гаргасан байна.
Тогтоолын дагуу “Улсын алдарт сайн малчин” цол олгосон малчдад хүндэт үнэмлэх, сүргийн олонхыг эзэлж байсан хээлтүүлэгч малын мөнгөн дүрс, мөнгөн бүслүүр, “1000 мал” хэмээх мөнгөн үсэг бүхий хувин, төрийн сүлд болон таван хошуу мал сийлбэрлэсэн мөнгөн чимэглэл самбар, зургаан хасагтай таван тотго бүхий ган болд тулга, эрээн майхан, өвсний морин машин, малын хашаа зэрэг дурсгалын зүйлсийг улсаас гардуулж эхэлсэн байна.
