Завхан аймгийн музейн хутагтуудын танхимын гол үзмэрүүдийн нэг нь шашны алдартнуудын хэрэглэж байсан үзмэрүүд юм.
Хутагтуудын танхимыг 2016 онд музейн танхим болгож төрөлжүүлэн нээсэн.
Энэ онд XX зууны Монгол улсын шашин, төрийн нэрт зүтгэлтэн Завхан аймгийн Түдэвтэй сумын уугуул Башлуу овогт Дилов хутагт Жамсранжавын чандар буюу лагшин биеийн адистид Их шүтээнийг АНУ-аас залах хүндэтгэлийн үйл ажиллагаа Улиастай хотод болсон юм.
Дилов хутагтын чандар буюу адистид их шүтээнийг эх орондоо, тэр дундаа төрсөн нутагт нь залсан юм. Хутагтын шавийн төрсөн хүүхэд Гяамчо Пальжид хадгалагдаж, хамгаалж байсан их шүтээнийг Завхан аймгийн Бурхан шашинтны төв Төгс Буянт Жавхлант хийдэд сэмбэрэмтэй угтан залж, сүсэгтэн олон адис авч хүндэтгэл үзүүлж, аймгийн алдартны музейн Хутагтын танхимын төв гүнгэрваад залсан.
Өнөөдөр энэ танхимд Дилов хутагтын адистид их шүтээн, утлага, хэрэглэж байсан арц хүж, зулын гол зэрэг тахилын зүйлүүд болон өөрийнх нь дуу хоолойгоор айлдсан номын хуурцаг байршиж байна.
Сонирхуулахад, Монголын шашин, төрд үнэлж баршгүй хувь нэмэр оруулсан Дилов хутагт Жамсранжавыг 1990 онд цагаатгасан байна. Түүнийг цагаатгасан албан бичиг мөн энэ танхимд дэлгэгдсэн.
Хутагтуудын танхимд дэлгэгдсэн шашны төлөөлөгч, алдартнуудын эдэлж хэрэглэж байсан үзмэрүүдээс адис авах, түүхийг нь илүү дэлгэрэнгүй тайлбарлаж өгөхийг үзэгчид хүсдэг. Дилов хутаг Б.Жамсранжавын суварга гэхэд алтан шармал өнгөтэй дөрвөн талт адил хэмжээтэй суурьтай. Суварга дээр цэцгэн хээг хөөмөлдэж хийсэн. Бусад суварганаас Их хутагтын адистат чандарыг дотор талд нь хийж аравнайлсан байдлаар ялгагдана. Гүнгэрваа дотор бурхан багшийн дүрс бүхий гуутай үзмэр юм.
Мөн Дилов хутаг Б.Жамсранжавын хэрэглэж байсан сандал болж, түшиж явдаг гар таяг үзмэрт дэлгэгдсэн байна. Шигтгэдэг үзүүртэй сунадаг хүрэн ширэн бүрээсэн суудалтай юм. 1994 онд АНУ-аас үзмэрт ирүүлсэн юм.
Мөнгөн түрхэцтэй завьяа. Бариул цорго хоёрт нь луу дүрсийг товойлгон гаргасан, суурь хүзүү хоёр дээрээ цэцгэн хээтэй, гуулиар хийж мөнгөөр өнгөлсөн. Суурь нь бадамлянхуа хээтэй завьяа хадгалагдаж байна.
Дилов хутаг Б.Жамсранжавын хэрэглэж байсан шаазан дашмаг.
Хөх цоохор өнгөтэй шаазан, амсарын хэсгийг мөнгөлсөн таг нь мөнгөн, хоёр талдаа сэнжтэй. Бээжингийн шаазан үйлдвэрт хийгдсэн тэмдэглэгээтэй дашмаг юм хэмээн Завхан аймгийн музейн тайлбарлагч О.Оюунцэцэг тайлбарлалаа.
