Говь-Алтай аймгийн “Жангар” музейд МЭӨ III-VII зуунд хамаарах хосгүй үнэт үзмэр, хүрэл морь хадгалагдаж байна.
Өмнөд Сибирийн Минусын хонхроос олдсон янгирын дүрстэй төстэй төмөр зэвсэг, МЭӨ III–VII зуунд хамаарах уг хүрэл морийг Жаргалан сумын нутгаас олж, 1965 онд музейн сан хөмрөгт бүртгэжээ. Морины хэлбэр, хэв шинжийг нарийн ажвал биеийн галбир нь уран чамин, гоёмсог согоо чихтэй бөгөөд ихэд бодитойгоор баримлаар хавтгай суурин дээр цутгаж урласан байна. Сүүлийг нь мушгиж, нүдийг дугариг нэвт цоорхойгоор, дэлийг нарийсган, өвдөг, борвины үеийг залгаатайгаар урласнаас гадна суурийг эргэн тойронд нь иржгэр хээтэй бүтээсэн нь онцгой содон харагддаг.
Уг хүрэл морь нь 2005 онд зохион байгуулсан Монголын музейн шилдэг үзмэрийн уралдаанд түрүүлж байсан бөгөөд Говь-Алтай аймгийн түүхэн дурсгал, есөн гайхамшгийн нэгээр өргөмжилсөн юм.
Сонирхуулахад, 2017 онд Говь-Алтай аймгийн төв Алтай хотын өнгө үзэмжийг сайжруулах, аялал жуулчлалыг хөгжүүлэх, мөн нутгийн ирээдүй болсон хүүхэд, залууст үүх түүхээ таниулах зорилгоор хосгүй үнэт үзмэр болох хүрэл морины хөшөөг босгожээ.
Тус аймгийн музейг анх 1947 онд “Кабинет” нэртэйгээр байгуулсан бөгөөд өдгөө 2500 гаруй үзмэртэй болсон байна. Музейд хосгүй үнэт хүрэл мориноос гадна МЭӨ 4000–5000 жилийн өмнөх хаш чулуун сүх, МЭӨ III-VII зууны үеийн хүрэл морь, XIX зууны үед хэрэглэж байсан Засагт ханы мөнгөн барс бариулт тамга, Галданбошигтын эмээл зэрэг ховор, нандин түүх, соёлын дурсгалуудыг хадгалж байна.
