Улсын дуурь бүжгийн эрдмийн театрын тайзнаа “Уран хас” балетыг энэ сарын 31, хоёрдугаар сарын 1-нд толилуулна.
“Уран хас” балет монголын үндэсний шилдэг сонгодог урлагийн бүтээлийн нэг болох Төрийн шагналт, Ардын жүжигчин Ж.Чулууны бүтээсэн бүжгэн жүжиг юм. Тус балетыг Хөдөлмөрийн баатар, Ардын жүжигчин, Төрийн соёрхолт Б.Жамьяндагва дэглэсэн. Харин балетын анхны тоглолтод УГЗ удирдаач Ч.Жамсранжав, Ардын зураач Ч.Гунгаасүх нар ажиллаж, гол дүрүүдэд Э.Оюунбат, Д.Батхүрэл, Ю.Цэрмаа, Ю.Оюун, Н.Эрдэнэцэцэг нарын балетын гоцлоочид тоглож байжээ.
Анх 1973 онд үзэгчдийн хүртээл болсон “Уран хас” балет хоёр бүлэг, гурван үзэгдэлтэй. Энэхүү балетыг 2008 онд дахин шинэчилж, буга согооны бүжгийн хэсгийг нь хасаж, вальсын хэсгийг нь онцлон гаргаж тавьсан байна. 2013 онд “Уран хас” балетын 40 жилийн ойн хүрээнд буга, согооны бүжгийн хэсгийг дахин оруулж балетыг хуучин хэлбэрээр нь тоглож байв. Буга, согооны бүжгийн хэсэг нь олныг хамарсан сонирхолтой хэсэг юм. Энэ бүжгийн хэсгийг дахин сэргээхийн тулд бугын 12, согооны 12 хувцсыг шинээр хийж байсан түүхтэй.
Энэ жил Ж.Чулууны мэндэлсний 90 жилийн ой тохиож байна.
