Засгийн газрын өчигдөр /2026.01.28/-ийн хуралдаанаас төрийн байгууллагын чиг үүргийн давхардлыг арилгах зорилгоор “Чингис хаан” үндэсний музейд Чингис хааны өв соёлын хүрээлэнг нэгтгэхээр шийдвэрлэлээ.
Тус музейд хүрээлэнг нэгтгэснээр зохион байгуулалтын бүтэц, үндсэн үйл ажиллагаанд өөрчлөлт орохгүй. Мөн төрийн болон орон нутгийн өмчийн төсөвт нэмэлт ачаалал үүсгэхгүй, төрийн байгууллагын чиг үүргийн давхардал арилж, Чингис хаан судлалыг хөгжүүлэх, түүний өв уламжлалыг хадгалж хамгаалах, сурталчлах ажлыг нэгдсэн арга зүй, зохистой удирдлагаар хангах, эрдэм шинжилгээ, судалгааны ажлын үр дүн, бүтээмжийг дээшлүүлэх, үйлчилгээ, үйл ажиллагааны давхардсан зардлыг хэмнэх зэрэг эерэг үр дүн гарна.
Түүнчлэн, “Чингис хаан” үндэсний музейг Чингис хаан судлалын олон улсын төв болгон бэхжүүлж, хөгжүүлэхэд чухал хөшүүрэг болно гэж ЗГХМОНХГ-аас мэдээллээ.
