“Blackpink” хамтлагийн гишүүн Лисз Тайландын “Улаан бадамлянхуйн тэнгис” хэмээх аялал жуулчлалын бүсийн зочдын тоог огцом нэмэгдүүлэхэд нөлөөлжээ. Албаныхан энэ жилийн бадамлянхуа цэцэглэх улиралд 120 мянга хүртэл жуулчин хүлээн авах төлөвтэй байгаагаа мэдэгдлээ.
Тайландын Удон Тхани мужийн Кумпхавапи дүүрэгт байрлах уг намагт нуур нь улирлын чанартайгаар ягаан бадамлянхуа цэцэгсээр бүрхэгддэгээрээ алдартай бөгөөд ихэвчлэн нэгдүгээр сараас хоёрдугаар сарын хооронд оргилдоо хүрч, жил бүр олон жуулчин татдаг.
Харин энэ жил Тайландын Аялал жуулчлалын газар (TAT)-аас хэрэгжүүлсэн, Лизаг оролцуулсан сурталчилгааны кампанит ажлын дараа жуулчдын сонирхол эрс өссөн гэж албаны хүмүүс болон орон нутгийн үйлчилгээ эрхлэгчид онцолжээ. Энэхүү кампанит ажил нь Тайланд болон гадаадын жуулчдад төдийлөн танигдаагүй газруудыг сурталчлах зорилготой байсан талаар “The Nation” мэдээлсэн байна.
Түүнчлэн 2025 оны аравдугаар сард Лизаг Тайландын дэлхийн хэмжээний аялал жуулчлалын элчээр томилсон нь түүний алдартай байдал болон түүний тоглосон, Тайландад зураг авалтыг нь хийсэн, HBO-ийн “The White Lotus” цувралаас үүдэлтэй сонирхлыг ашиглах зорилготой алхам байсан гэж үзэж байна. Аялал жуулчлал, спортын яамны төрийн нарийн бичгийн дарга Наттхрия Тхавивонг жуулчдын сонирхол, өсөлтийг “Лизагийн нөлөө” (Lisa effect)-тэй шууд холбон тайлбарлажээ.
Тайландын Аялал жуулчлалын газрын захирагч Тхапани Киадпайбулын хэлснээр “Улаан бадамлянхуйн тэнгис”-ийг голчлон тайланд жуулчид зорьдог. Харин энэ улиралд гадаадын жуулчдын эзлэх хувь нь дотоодын жуулчидтай бараг тэнцэх хэмжээнд хүрсэн байна. Энэ нь хилийн чанад дахь сонирхол тодорхой хэмжээнд тэлснийг харуулж байна” хэмээн онцолжээ.
