Завхан аймгийн музейд 70 гаруй танка зураг хадгалагдаж байна. Үүний нэг нь Дамдинчойжоо буюу эрлэг номун хааны догшин бурхны шүтээн зураг юм.
Уг танка зураг нь хар өнгийн даавуун суурьтай, эрлэг номун хааны догшин дүрийг тод томруунаар харуулсан бөгөөд XIX–XX зууны үеийн бүтээл юм. Уг бүтээл нь үзмэр нь цуглуулгаар музейн санд ирсэн байна.
Гэлүгба ёсны гол шүтээний нэгэн болох эрлэг номун хаан нь гурван мэлмийгээ эргэлдүүлэн, амаа ангайж, соёогоо мэрзийлгэсэн догшин бухын тэргүүнтэй. Бараан хөх лагшинтайгаар зурагт дүрсэлсэн байна.
Түүний тэргүүнд алтан очир, гавал титэм зүүж, гархин ээмэг болон бурхадын таван чимэг сэлтээр лагшнаа чимсэн бөгөөд хүзүүндээ хохимой толгойн эрхи зүүжээ. Баруун мутартаа ясан бороохой далайж, зүүн мутартаа гох болон таван үзүүрт очир толгойтой цалам барьсан байдлаар дүрсэлжээ. Эрлэг номун хаан нь цустай гавал, гурван үзүүрт сэрээ барьсан Замунди хэмээх дагинын хамтаар бадам цэцгийн мандал дээр, нүгэлт хар эмийг цээрлүүлэн хэвтэх догшин бухын нуруун дээр зогсож буйгаар танка зурагт дүрсэлсэн байна.
Танка буюу “Шүтээн” зургийг бурхны шашинд нэвтэрсэн бурхан зураач буюу зөвхөн бурхан урлаач нар зурдаг. Тухайн бурхныг зурахдаа бодийн сэтгэлийг үүсгэж бүхий л үйлээрээ бясалгал үйлдэж байгаа мэт бүтээн зурдаг онцлогтой юм гэж Завхан аймгийн музейн дарга Ж.Юнрэндорж ярилаа.
Сонирхуулахад өнгөрсөн жил тус музейд хадгалагдаж байгаа 72 танка зургийг Соёлын өвийн үндэсний төвийн сэргээн засварлах газрын баг сэргээн засварлажээ.
